حکومت نے 4500 روپے فی من ریٹ نہ دیا توکسان گندم کاشت نہیں کرینگے: کسان اتحاد

10-21-2025

(ویب ڈیسک) کسان اتحاد پاکستان کے چیئرمین خالد حسین نے اعلان کیا کہ اگرحکومت نے 4500 روپےفی من ریٹ نہ دیا توکسان گندم کاشت نہیں کریں گے۔

اپنے بیان میں خالد حسین کا کہنا تھ اکہ وزیراعظم نے گندم 3500  روپے فی من خریدنے کا اعلان کیا ہے، گندم کا یہ ریٹ کسان کی لاگت سے کم ہے، کسان کی لاگت 4000 سے 4500 روپے فی من تک پہنچ چکی ہے،حکومت کسانوں سے مشاورت کیے بغیر فیصلے کررہی ہے جو کسانوں کے مفاد میں نہیں۔ انہوں نے کہا کہ کسان اپنی محنت کا جائز معاوضہ مانگتا ہے، خیرات نہیں، سیلاب نے کسان کوپہلے ہی کمزور کیا، اب کم ریٹ دے کر مزید دباؤ ڈالا جا رہا ہے۔ چیئرمین کسان اتحاد پاکستان نےاعلان کیا کہ اگرحکومت نے 4500 روپےفی من ریٹ نہ دیا توکسان گندم کاشت نہیں کریں گے۔ ان کا مزید کہنا تھاکہ گنےکی قیمت 350 روپے فی من دی جارہی ہے اور چینی 175 روپے فی کلو فروخت ہورہی ہے لہٰذا گنےکا ریٹ کم ازکم 600 روپےفی من مقررکیا جائے، کپاس کا ریٹ بھی کسان کے نقصان کا باعث ہے، 12000 روپے فی من مقررکیا جائے۔ خیال رہے کہ گزشتہ روز وفاقی حکومت نے گندم پالیسی کی منظوری دی تھی جس کے مطابق گندم کی فی من قیمت 3500 روپے مقرر کی گئی تھی۔ وفاقی اور صوبائی حکومتیں تقریباً 6.2 ملین ٹن کے سٹریٹجک ذخائرحاصل کریں گی، گندم کی دستیابی یقینی بنانے کیلئے بین الصوبائی نقل و حرکت پر پابندی نہیں ہوگی۔