محمد رضوان قومی ون ڈے ٹیم کے کپتان رہیں گے یا نہیں؟ فیصلہ آج

10-20-2025

(لاہور نیوز) وکٹ کیپر بیٹر محمد رضوان قومی ون ڈے ٹیم کے کپتان رہیں گے یا نہیں؟ اس حوالے سے فیصلہ آج ہو گا۔

پاکستان کرکٹ بورڈ نے آج سلیکشن اور ایڈوائزری کمیٹی کا مشترکہ اجلاس بلا رکھا ہے، اجلاس میں محمد رضوان کو کپتان برقرار رکھنے یا نہ رکھنے سے متعلق فیصلہ ہو گا۔قومی وائٹ بال ہیڈ کوچ مائیک ہیسن کی سفارش پر ون ڈے ٹیم کی کپتانی سے متعلق اجلاس بلایا گیا ہے، مشترکہ اجلاس میں جنوبی افریقہ کے خلاف ون ڈے سیریز کیلئے کپتان کا فیصلہ کیا جائے گا۔ ذرائع کے مطابق شاہین آفریدی اور سلمان علی آغا قومی ون ڈے ٹیم کی کپتانی کے امیدوار ہیں، محمد رضوان کو گزشتہ سال 27 اکتوبر کو قومی ون ڈے ٹیم کا کپتان بنایا گیا تھا۔محمد رضوان پاکستان ون ڈے ٹیم کی قیادت کرنے والے 31 ویں کپتان بنے تھے، ان کی قیادت میں پاکستان نے آسٹریلیا کو آسٹریلیا میں 22 سال بعد سیریز میں شکست دی۔ بطور کپتان محمد رضوان نے جنوبی افریقہ اور زمبابوے کو بھی ون ڈے سیریز میں شکست دی، ان کی کپتانی میں پاکستان چیمپینز ٹرافی، تین ملکی سیریز اور ویسٹ انڈیز کے خلاف شکست سے دوچار ہوا۔