پنجاب میں نئی ہاؤسنگ سوسائٹیوں پر پابندی، واٹر ٹریٹمنٹ پلانٹ لازمی قرار

10-16-2025

(لاہور نیوز) ای پی اے پنجاب (محکمہ تحفظ ماحولیات) نے ماحولیاتی تحفظ اور پائیدار ترقی کیلئے بڑا فیصلہ کرتے ہوئے اعلان کیا ہے کہ پنجاب میں کسی نئی ہاؤسنگ سوسائٹی کو منظوری نہیں دی جائے گی جب تک کہ اس کے لے آؤٹ پلان میں واٹر ٹریٹمنٹ پلانٹ کیلئے جگہ مختص نہ ہو۔

ڈی جی ماحولیات پنجاب عمران حامد شیخ کا کہنا ہے کہ بغیر ٹریٹمنٹ گندا پانی چھوڑنے والی ہاؤسنگ سوسائٹیز ماحول اور انسانی صحت کیلئے سنگین خطرہ بن چکی ہیں، اب کسی بھی نئی سکیم کو ماحولیاتی منظوری صرف اسی صورت میں دی جائے گی جب واٹر ٹریٹمنٹ پلانٹ کا ڈیزائن اور مختص جگہ واضح طور پر پیش کی جائے گی۔ نئی ہاؤسنگ سوسائٹیز کی منظوری مشروط کر دی گئی، ہر سکیم کے لے آؤٹ پلان میں واٹر ٹریٹمنٹ پلانٹ کیلئے جگہ مختص کرنا لازمی قرار دیا گیا، بغیر ٹریٹمنٹ گندے پانی کے اخراج پر سخت پابندی عائد کی گئی ہے، ٹریٹمنٹ پلانٹ کی زمین کسی اور مقصد کیلئے استعمال کرنے پر قانونی کارروائی کی جائے گی۔ ای پی اے نے منظوری کے عمل میں سختی سے عملدرآمد کی ہدایت دے دی، تمام ڈویلپمنٹ اتھارٹیز اور ڈپٹی کمشنرز کو باضابطہ احکامات جاری کر دیئے گئے۔