باٹا پور: دفتر خالی کرنے کے تنازع پر فائرنگ، ملزم گرفتار

10-16-2025

(لاہور نیوز) باٹا پور میں دفتر خالی کرنے کے تنازع پر فائرنگ کے نتیجے میں ایک ملازم سلیم زخمی ہو گیا۔

فائرنگ کے واقعہ میں ملوث ملزم عامر کو پولیس  نے گرفتار کر لیا ہے اور اس کے قبضے سے پستول اور گولیاں بھی برآمد کر لی گئیں۔ ایس پی کینٹ کیپٹن (ر) قاضی علی رضا  نے میڈیا کو بتایا کہ ملزم عامر پر اقدامِ قتل کا مقدمہ درج کیا گیا ہے، انہیں فائرنگ کے واقعے میں زخمی ہونے والے ملازم سلیم کی حالت کو مدنظر رکھتے ہوئے گرفتار کیا گیا۔ ایس پی کینٹ نے کہا کہ معصوم شہریوں کو تکلیف پہنچانے والے عناصر کسی رعایت کے مستحق نہیں ہیں، قانون ہاتھ میں لینے والے افراد کے ساتھ آہنی ہاتھوں نمٹا جائے گا، ملزم کو تفتیش کیلئے انویسٹی گیشن کے حوالے کر دیا گیا ہے تاکہ اس کے خلاف مزید قانونی کارروائی کی جا سکے۔ پولیس کا کہنا ہے کہ ملزم کی گرفتاری کے بعد اس کے خلاف تمام قانونی کارروائیاں مکمل کی جائیں گی تاکہ شہریوں کی حفاظت کو یقینی بنایا جا سکے۔