پنجا ب بھر میں کوئلہ، لکڑی یا چارکول استعمال کرنیوالے ریسٹورنٹس پر پابندی عائد
10-15-2025
(لاہور نیوز) ڈی جی ماحولیات کی جانب سے کوئلہ، لکڑی یا چارکول استعمال کرنے والے ریسٹورنٹس پر پابندی عائد کر دی گئی۔
ڈی جی ماحولیات کی جانب سے تمام ہوٹل اور باربی کیو اسٹیشنز کو 15 روز کے اندر سکشن ہُوڈز لگانے کا حکم دے دیا گیا، دھواں، چکنائی اور بدبو پھیلانے والے ریسٹورنٹس کیخلاف کارروائی کا عندیہ بھی دیا گیا ہے، اس سلسلے میں ڈی جی ماحولیات نے تمام ڈپٹی کمشنرز کو فوری عملدرآمد یقینی بنانے کی ہدایت کی ہے۔ حکم عدولی پرہوٹل مالکان کیخلاف ماحولیاتی قوانین کے تحت مقدمات درج ہونگے، ماحولیاتی تحفظ ایجنسی کی ٹیمیں فیلڈ میں سرگرم جبکہ چیکنگ کے احکامات بھی جاری کر دیے گئے ہیں۔ ڈی جی عمران حامد شیخ کا کہنا ہے کہ دھواں چھوڑنے والے ریسٹورنٹس کی کوئی گنجائش نہیں، پنجاب فوڈ اتھارٹی اور ای پی اے مشترکہ کارروائیاں کریں گے تاہم پنجاب بھر میں فضائی آلودگی برداشت نہیں کی جائے گی، 15 روز میں سکشن سسٹم نہ لگانے والوں کے خلاف کارروائی ہو گی۔