منی لانڈرنگ کیس: پرویز الہٰی کی بریت کی درخواست پر فیصلہ محفوظ

10-15-2025

لاہور (محمد اشفاق) لاہور کی سپیشل سینٹرل عدالت پرویز الہی کے ایف آئی اے منی لانڈرنگ کے مقدمے میں بریت کی درخواست پر محفوظ فیصلہ 25 اکتوبر کو سنائے گی۔

سپیشل سینٹرل عدالت کے جج محمد عارف خان نیازی  نے گزشتہ سماعت کا تحریری حکم جاری کیا۔ عدالت نے اپنے تحریری حکم میں لکھا کہ چوہدری پرویز الہی کی ایک روزہ حاضری معافی کی درخواست دائر ہوئی، سپیشل پراسیکیوٹر  نے اعتراض کیا کہ گزشتہ سماعت پر حاضری معافی مکمل نہیں تھی، سپیشل پراسیکیوٹر  نے بتایا کہ حاضری معافی کی درخواست کے ساتھ میڈیکل ادویات کا نسخہ موجود نہیں تھا۔ عدالت نے لکھا کہ موجودہ حاضری معافی کی درخواست میں سروسز ہسپتال کے ڈاکٹر سے چیک اپ اور اس کا باقاعدہ تصدیق شدہ نسخہ موجود ہے، ڈاکٹر  نے آرام کا مشورہ دیا ہے، عدالت پرویز الہی کی ایک روزہ حاضری معافی کی درخواست منظور کرتی ہے۔  اپنے تحریری حکم میں عدالت نے لکھا کہ پرویز الہی کی بریت کی درخواست پر مکمل دلائل سن لئے ہیں، عدالت پرویز الہی کی بریت کی درخواست پر محفوظ فیصلہ 25 اکتوبر کو سنائے گی۔