ایم ڈی کیٹ 2025 کے پیپرز کا پری ہاک تجزیہ لازمی قرار

10-14-2025

(ویب ڈیسک) پی ایم اینڈ ڈی سی نے یونیورسٹیوں کو ہدایت جاری کی ہے کہ ایم ڈی کیٹ 2025 کے پیپرز کا پری ہاک تجزیہ لازمی قرار دیا جائے۔

تفصیلات کے مطابق ایم ڈی کیٹ 2025 کا امتحان 26 اکتوبر کو منعقد ہو گا جس کے امتحان کے لئے 1 لاکھ 40 ہزار 125 امیدوار رجسٹرڈ ہوئے ہیں۔ ملک بھر میں 35 امتحانی مراکز قائم اور ایک بین الاقوامی مرکز ریاض میں ہو گا، ایم ڈی کیٹ امتحان یونیورسٹیوں کے ذریعے لیا جائے گا جس کا پی ایم اینڈ ڈی سی براہِ راست منتظم نہیں ہو گا۔ پی ایم اینڈ ڈی سی  نے امتحانی پالیسی اور ڈھانچہ یونیورسٹیوں کو فراہم کر دیا ہے، یونیورسٹیوں کو پیپر سیٹنگ، ڈویلپمنٹ اور پرنٹنگ کے دوران پی ایم اینڈ ڈی سی کے معیارات کی پابندی کرنا لازم ہو گا۔ یونیورسٹیوں کو ہدایت دی گئی ہے کہ سوالیہ پرچوں کا پری ہاک تجزیہ کر کے نصاب سے باہر سوالات کو ختم کریں جبکہ یونیورسٹیاں سوالیہ پرچوں کی رازداری سختی سے برقرار رکھیں۔ مزید برآں پرچے صرف سرکاری گواہوں کی موجودگی میں کھولے جائیں گے اور ایم ڈی کیٹ کے لئے ایڈمٹ کارڈز امتحان سے سات دن قبل امیدواروں کو جاری کئے جائیں گے، یونیورسٹیاں امتحان کے بعد سات دن کے اندر نتائج کا باضابطہ اعلان کریں گی۔