ممکنہ احتجاج : لاہور میں سکیورٹی سخت، تجارتی مراکز کھلے رکھنے کی یقین دہانی

10-14-2025

(ویب ڈیسک) ایس پی سٹی کا کہنا ہے کہ لاہور پولیس کی جانب سے شہر میں امن و امان برقرار رکھنے کے لیے مؤثر اقدامات کیے جا رہے ہیں، اور کسی کو قانون ہاتھ میں لینے کی اجازت نہیں دی جائے گی۔

انہوں نے کہا کہ شہری بلا جھجک بازاروں، مارکیٹوں اور تجارتی مراکز کا رخ کریں، تمام مقامات پر پولیس کی نفری تعینات ہے اور مکمل سکیورٹی فراہم کی جا رہی ہے۔ ایس پی سٹی نے تاجر برادری سے اپیل کی کہ وہ خوف و خدشات کو بالائے طاق رکھتے ہوئے اپنی تجارتی سرگرمیاں معمول کے مطابق جاری رکھیں۔ ان کا کہنا تھا کہ املاک، بازاروں اور تجارتی مراکز کی حفاظت پولیس کی اولین ترجیح ہے اور امن و امان کو خراب کرنے والے عناصر کے ساتھ سختی سے نمٹا جائے گا۔ ایس پی سٹی نے مزید کہا کہ شہری کسی بھی ہنگامی صورتحال یا شکایت کی صورت میں فوری طور پر 15 پر کال کریں، آپ کی حفاظت ہماری ذمے داری ہے۔