پنجاب: سیلاب زدہ علاقوں کے کاشتکاروں میں ویجیٹیبل سیڈز کے 4 لاکھ پیکٹ مفت تقسیم

10-12-2025

(ویب ڈیسک) سیکرٹری زراعت پنجاب افتخارعلی سہو کی زیر صدارت صوبے میں سبزیوں کی پیداوار میں اضافے سے متعلق اجلاس منعقد ہوا۔

اجلاس میں بتایا گیا کہ محکمہ زراعت کی جانب سے سیلاب زدہ علاقوں کے کاشتکاروں میں سبزیوں کے بیج کے 4 لاکھ پیکٹ مفت تقسیم کیے جا رہے ہیں۔ ان پیکٹس میں کچن گارڈننگ کے لیے آٹھ اقسام کی سبزیاں شامل ہیں جو پانچ مرلہ رقبے پر کاشت کی جا سکتی ہیں۔ سیکرٹری زراعت نے بتایا کہ محکمہ زراعت کا مقصد سیلاب متاثرہ کاشتکاروں کی بحالی اور خود کفالت میں مدد فراہم کرنا ہے۔ انہوں نے کہا کہ جدید پیداواری ٹیکنالوجی سے متعلق کاشتکاروں کی رہنمائی جاری ہے تاکہ سبزیوں کی پیداوار میں خاطر خواہ اضافہ کیا جا سکے۔ افتخارعلی سہو نے متعلقہ افسران کو ہدایت کی کہ بیجوں کی بروقت ترسیل اورکسانوں کی سہولت کو یقینی بنایا جائے تاکہ زیادہ سے زیادہ لوگ اس پروگرام سے مستفید ہو سکیں۔