ریاست مدینہ کی تشکیل سے نبی اکرم ﷺ نے انسانی اجتماعیت کو تحفظ دینے کا دستور بنایا: مفتی عبد الخالق آزاد

10-06-2025

(لاہور نیوز) مفتی عبد الخالق آزاد رائپوری نے کہا ہے کہ ریاست مدینہ کی تشکیل سے نبی اکرم ﷺ نے انسانی اجتماعیت کو تحفظ دینے کا دستور بنایا ہے۔

ادارہ رحیمیہ علوم قرآنیہ کے قیام کی 25 سالہ تقریب پر پندرہ سو سالہ ولادت باسعادت رسول اللہ صلی اللہ علیہ وسلم کے موضوع پر کانفرنس کا انعقاد ہوا جس میں ڈائریکٹر جنرل ادارہ رحیمیہ مفتی عبد الخالق آزاد رائپوری، صدر مفتی مختار حسن، ڈاکٹر راو عبد الرحمن، عرفان یونس بٹ سمیت مختلف شعبہ ہائے زندگی سے وابستہ افراد کی بڑی تعداد نے شرکت کی۔  کانفرنس سے خطاب کرتے ہوئے مفتی عبد الخالق آزاد رائپوری نے کہا کہ سیرت نبوی انسانوں کی آزادی کی نگہبان اور مشعل راہ ہے۔ ریاست مدینہ کی تشکیل سے نبی اکرم صلی اللہ علیہ وسلم نے انسانی اجتماعیت کو تحفظ دینے کا دستور بنایا۔ انہوں نے کہا کہ خلفائے راشدین کے زمانے میں ہی موجودہ پاکستانی جغرافیائی حدود میں دین اسلام کی شمع روشن ہو چکی تھی اس خطے نے دین اسلام کو اپنا قومی دین بنایا۔ ان کا کہنا تھا کہ ادارہ رحیمیہ دین اسلام کا قرآنی شعور نوجوان نسل میں پھیلا رہا ہے اس خطے کے اولیاء اللہ، محدثین نے انسانی ترقی کیلئے اہم کردار ادا کیا۔ دین اسلام کی اساس پر قائم حکومت کمزور انسانوں کو تحفظ فراہم کرتی ہے۔  مفتی عبد الخالق آزاد نے مزید کہا کہ دین اسلام پر قائم معاشرے میں رواداری اور انسانی حقوق کا تحفظ ہوتا ہے، انگریزوں نے اس خطے پر تسلط کے بعد یہاں کی بنیادی سیاسی، معاشی اور سماجی اقدار تبدیل کر دی، شریعت کے برعکس رومن لاء پر مبنی عدالتی نظام، قانونی نظام تشکیل دے کر انگریزوں نے انسانی حقوق ثبوتاژ کیے گئے۔ کانفرنس سے خطاب کرتے ہوئے مفتی مختار حسن کا کہنا تھا کہ آج ہمیں سوچنا ہے کہ ہماری اقدار کس بنیاد پر قائم ہوں گی مغرب کا نظام اور معاشرت مسلط ہوگی یا ہماری ویلیوز دین اسلام کی انسان دوستی پر مبنی اقدار پر قائم ہوں گی۔ آج ہمارا نوجوان اپنی تاریخ سے نابلد ہے۔ اگر ہم نے آج قوم بننا ہے تو اپنی قومیت کو محفوظ کرنا ہے۔کسی بین الاقوامیت کے پروپیگنڈہ کا شکار نہ ہوں۔قومیت اپنی زبان اپنی زمین اور اپنی ویلیوز سے پیدا ہوتی ہیں۔