لیسکو میں سنگل فیز میٹرز نایاب، صارفین کو اوسط بلنگ کا سامنا

10-06-2025

(لاہور نیوز) لاہور الیکٹرک سپلائی کمپنی (لیسکو) میں سنگل فیز میٹرز کی ایک بار پھر شدید قلت پیدا ہو گئی۔

ذرائع  نے انکشاف کیا ہے کہ خراب میٹرز کی تعداد میں خطرناک حد تک اضافہ ہو چکا ہے اور ڈیفیکٹو کوڈ لگنے والے میٹرز کی مجموعی تعداد ساڑھے 3 لاکھ سے تجاوز کر گئی ہے، لیسکو انتظامیہ  نے فیلڈ افسران کو ہدایت کی ہے کہ وہ خراب میٹرز  کے حامل صارفین کے بلوں پر فی الحال ڈیفیکٹو کوڈ نہ لگائیں۔ ذرائع کا کہنا ہے کہ ڈیفیکٹو کوڈ لگائے بغیر ہی صارفین کو ایوریج بلنگ کی جا رہی ہے جس کے باعث انہیں اپنے اصل استعمال سے کہیں زیادہ بل موصول ہو رہے ہیں، اس اقدام پر صارفین  نے شدید تحفظات کا اظہار کرتے ہوئے کہا ہے کہ کمپنی اپنی انتظامی ناکامیوں کا بوجھ صارفین پر ڈال رہی ہے۔ ادھر لیسکو انتظامیہ  نے خراب میٹرز کی وقتی طور پر تبدیلی کیلئے فیلڈ افسران کو ہدایت جاری کی ہے کہ وہ پرانے سٹاک سے موجود میٹرز استعمال کریں، اس کے ساتھ ساتھ سی پی 90 کی لسٹ میں شامل میٹرز کو نیٹ میٹرنگ کیلئے اتارے گئے سنگل فیز میٹرز سے تبدیل کرنے کا بھی فیصلہ کیا گیا ہے۔