قومی اسمبلی اور سینیٹ کے اجلاس آج، سیلاب، فلسطین، افغان مہاجرین پر بات ہو گی

10-06-2025

(لاہور نیوز) آج سینیٹ اور قومی اسمبلی کے اجلاس ہوں گے جن میں مختلف بل پیش کرنے کے ساتھ فلسطین سے اظہار یکجہتی کی قرارداد بھی پیش ہو گی جبکہ سیلاب، افغان مہاجرین، صحت پالیسی پر غور ہو گا۔

قومی اسمبلی کا 15 نکاتی اور سینیٹ کا 39 نکاتی ایجنڈا جاری کر دیا گیا۔ قومی اسمبلی کے اجلاس میں وقفہ سوالات کے بعد توجہ دلاؤ نوٹس شامل ہے، قومی اسمبلی کے اجلاس کے ایجنڈے میں دا ویسٹ پاکستان موٹر وہیکل ٹیکسیشن ترمیمی بل 2025 پیش کیا جائے گا۔ قومی اسمبلی میں اسلام آباد لوکل گورنمنٹ دوسری ترمیمی بل 2025 پیش کیا جائے گا، مختلف ایشوز پر دو تحاریک منظوری کے لئے پیش کی جائیں گی، مزید کئی بلز اور اہم قومی امور زیر غور لائے جائیں گے۔ سینیٹر شیری رحمان کی جانب سے پلاسٹک کور پر پابندی کا بل پیش کیا جائے گا، سینیٹر انوشہ رحمان ایس ای سی پی ایکٹ میں ترمیمی بل پیش کریں گی، ورچوئل اثاثہ جات کے ریگولیٹری فریم ورک کا بل بھی پیش ہو گا۔ سینیٹر کامران مرتضی پاکستان سائیکولوجیکل کونسل قائم کرنے کا بل لائیں گے، سٹیٹ بینک ایکٹ اور میڈیکل اینڈ ڈینٹل کونسل ایکٹ میں ترامیم پر بل پیش ہوں گے، یونیورسٹیوں میں مستحق افراد کے لئے خصوصی نشستیں رکھنے کا بل زیر غور آئے گا۔ اس کے علاوہ گرفتار اور زیرِ حراست افراد کے حقوق کے تحفظ کا بل پیش ہو گا، ملتان میں فاطمہ یونیورسٹی آف سائنس اینڈ ٹیکنالوجی کے قیام کا بل ایجنڈے میں شامل ہے، انسانی سمگلنگ کی روک تھام کے بل میں ترمیم سینیٹ میں پیش ہو گی۔ پاکستان پینل کوڈ میں ترمیمی بل سینیٹ میں پیش ہو گا، بچوں پر کارپوریل پنشمنٹ کی ممانعت کا بل واپس لیا جائے گا، عربی زبان کو لازمی مضمون بنانے کی قرارداد پیش ہو گی، فلسطین اور صمود فلوٹیلا کے ساتھ اظہارِ یکجہتی کی قرارداد پیش ہو گی۔ سیلاب متاثرین کی امداد اور معاوضے کے لئے قرارداد زیرِ غور آئے گی، بارش کے پانی کے ذخیرے اور زیرِ زمین پانی کی سطح بہتر بنانے پر بحث ہو گی، تھرپارکر و عمرکوٹ میں آسمانی بجلی سے جانی و مالی نقصان پر این ڈی ایم اے کی کارکردگی زیر بحث آئے گی۔ حکومت کی صحت پالیسی اور ہسپتالوں میں مفت علاج پر سینیٹ میں بحث ہو گی، ملک میں بڑھتی ہوئی بے روزگاری پر سینیٹ میں بات چیت کی جائے گی، افغان باشندوں کی واپسی اور پالیسی سازی پر ایوان میں بحث ہو گی، سینیٹ قواعد میں ترمیم کی تجویز بھی اجلاس میں زیر غور آئے گی۔ پاکستان میں حالیہ تباہ کن سیلاب پر ایوان میں تفصیلی بحث ہو گی۔