پنجاب: دفاتر میں روایتی فائل سسٹم ختم، تمام کاغذی کارروائی اب ڈیجیٹل ہو گی
10-03-2025
(لاہور نیوز) پنجاب حکومت نے بڑا اقدام کرتے ہوئے دفاتر میں روایتی فائل سسٹم ختم کرتے ہوئے تمام کارروائی ڈیجیٹل کردی ہے۔ اس اقدام سے حکومت کو کروڑوں روپے کی بچت متوقع ہے۔
چیف سیکریٹری پنجاب آفس کے ترجمان کے مطابق سول سیکریٹریٹ اور حکومت پنجاب کی تمام کاغذی کارروائی ڈیجیٹل کر دی گئی ہے، جس سے کروڑوں روپے کی بچت ہوگی، اب سے تمام پیپر ورک ڈیجیٹل کیا جائے گا، ترجمان نے بتایا کہ سول سیکریٹریٹ سےتمام ہارڈ کاپی فائلز ڈسپوز کر نے کے لیے جمع کر لی گئی ہیں اور تمام فائلز اور کاغذات ای فاس پر اپ لوڈ ہوں گے۔ ترجمان کا مزید کہنا تھا کہ روایتی فائل سسٹم ختم ہونے سے سٹیشنری کی مد میں کروڑوں روپے کی بچت ہوگی، 80 فیصد سے زائد سٹیشنری کا بجٹ ختم کر دیا جائے گا، کام کی رفتار تیز ہوگی اور کسی بھی دفتر میں فائل رکھنے کی صورت میں چیف سیکرٹری آفس کے لیے الرٹ جاری ہو گا تاہم ای فاس پر تمام فائلز ڈیجیٹلی اپ لوڈ ہوں گی جنہیں ٹریک کیا جا سکے گا۔