شاہدرہ سے رائیونڈ اسٹیشن تک 40 کلومیٹر طویل ریلوے ٹریک کے ساتھ گرین کوریڈور کی منظوری

10-03-2025

(ویب ڈیسک) شاہدرہ سے رائیونڈ اسٹیشن تک 40 کلومیٹر طویل ریلوے ٹریک کے ساتھ گرین کوریڈور منصوبے کی منظوری دی گئی ہے، جس پر 1 ارب 77 کروڑ روپے سے زائد لاگت آئے گی۔

ذرائع کے مطابق پی ایچ اے کے تحت یہ منصوبہ مکمل کیا جائے گا، جس کے تحت 664 کنال اراضی پر گرین کوریڈور تعمیر کیا جائے گا، 3 کنال سے 8 کنال تک ریلوے ٹریک کیساتھ ساتھ 30 سائٹس کی نشاندہی کر لی گئی ہے، اس منصوبے میں ریلوے ٹریک کے ساتھ پارکس، اوپن جم، واک ویز، چلڈرن پلے ایریاز، باؤنڈری فینسز اور بیڈمنٹن کورٹس شامل ہوں گے۔ منصوبے کو 4 مختلف فیز میں مکمل کیا جائے گا اور اس کی تکمیل دو سال میں متوقع ہے۔ موجودہ حالات میں پی ایچ اے لاہور کے پاس گرین کوریڈور جیسا میگا پراجیکٹ واحد منصوبہ ہو گا، منصوبے کا پہلا پیکیج ، شاہدرہ سے ریلوے سٹیشن اور دوسرا پیکیج ریلوے سٹیشن تا والٹن ہو گا، تیسرا پیکیج والٹن سے کوٹ لکھپت ، چوتھا پیکیج کوٹ لکھپت سے رائیونڈ سٹیشن تک ہو گا۔ یہ منصوبہ 2018 سے بجٹ میں شامل تھا لیکن اب تک اس پر کام شروع نہیں ہو سکا تھا، چند روز قبل پی اینڈ ڈی نے اس منصوبے کے ڈیزائن اور فنڈز کی منظوری دے دی ہے۔