لاہور ہائیکورٹ نے نسوار کی تیاری اور خرید و فروخت کو قانونی قرار دیدیا

10-02-2025

(لاہور نیوز) لاہور ہائی کورٹ ملتان بینچ نے نسوار کی خرید و فروخت پر پابندی ختم کر دی۔

عدالتی حکم  کے مطابق نسوار کی تیاری اور فروخت پر کوئی قانونی پابندی نہیں ہو گی، عدالت عالیہ کے جسٹس سید احسن رضا کاظمی نے پنجاب فوڈ اتھارٹی کیس میں مذکورہ بالا فیصلہ سنایا ہے۔ نسوار پر پابندی کے خلاف رٹ درخواست نمبر 4177/18 سات سال سے زیر التوا تھی، درخواست گزار ذیشان خان خٹک نے کونسل ذوالفقار علی سدھو کے ذریعے رٹ دائر کی تھی۔ پنجاب فوڈ اتھارٹی نے نسوار کو مضر صحت قرار دے کر نوٹیفکیشن جاری کیا تھا، عدالت نے نوٹیفکیشن پر سات سال قبل حکم امتناعی جاری کیا تھا، دوران سماعت پنجاب فوڈ اتھارٹی نے نوٹیفکیشن واپس لینے پر آمادگی ظاہر کی جس پر عدالت نے نسوار کی تیاری اور خرید و فروخت کو قانونی قرار دینے کا حکم جاری کر دیا ہے۔