پنجاب میں بھاری گاڑیوں کا پہلا ڈرائیونگ سکول قائم

09-27-2025

(ویب ڈیسک) پنجاب حکومت نے سڑکوں پر حفاظت بڑھانے اور حادثات کو کم کرنے کے لیے لاہور کے مناون ٹریفک پولیس لائنز میں بھاری گاڑیوں کا پہلا ڈرائیونگ ٹریننگ سکول قائم کیا ہے۔

 آئی جی پنجاب پولیس عثمان انور نے سکول کا دورہ کیا اور تربیتی سہولیات، جدید ڈرائیونگ سمولیٹرز اور دیگر ضروری انتظامات کا جائزہ لیا، ان کے ہمراہ ڈی آئی جی ٹریفک وقاص نذیر، سی ٹی او لاہور ڈاکٹر اطہر وحید، سیف سٹیز کے سی ای او ایس ایس پی امراء اطہر اور ڈی آئی جی ایس پی یو غازی صلاح الدین بھی موجود تھے۔ ڈرائیونگ ٹریننگ سکول خاص طور پر بس، ٹرک اور مال بردار گاڑیوں کے ڈرائیوروں کے لیے ڈیزائن کیا گیا ہے، جس میں جدید ڈرائیونگ سمولیٹرز، عملی سیشنز اور کلاس روم لیکچرز شامل ہوں گے تاکہ ڈرائیور حفاظتی اصولوں کو بہتر طریقے سے سمجھ سکیں اور سڑک پر حادثات کی شرح میں کمی آئے۔ تربیتی کورسز میں ڈرائیوروں کو ٹریفک قوانین، ڈرائیونگ کی حفاظتی تکنیکوں اور مختلف ہنگامی حالات سے نمٹنے کے طریقے بھی سکھائے جائیں گے، کورس مکمل کرنے والے ڈرائیورز کو سرکاری سرٹیفیکیٹ بھی فراہم کیا جائے گا، جو ان کے پیشہ ورانہ معیار کو تسلیم کرے گا اور مستقبل میں ملازمت کے مواقع بڑھائے گی۔ دورے کے دوران آئی جی عثمان انور نے مناواں ٹریفک پولیس لائنز کے مختلف شعبوں، بشمول ایم ٹی سیکشن اور انٹیگریشن سنٹر کا معائنہ کیا اور تربیتی انتظامات کا جائزہ بھی لیا۔