جوئے کی آن لائن تشہیر، مزید 3 یوٹیوبرز کے خلاف مقدمات درج

09-25-2025

(لاہور نیوز) نیشنل سائبر کرائم انویسٹی گیشن ایجنسی نے جوئے کی آن لائن تشہیر کرنے والے یوٹیوبرز کے خلاف گھیرا تنگ کر دیا، مزید 3 یوٹیوبرز کے خلاف مقدمات درج کر لیے گئے۔

معروف سوشل میڈیا انفلوئنسرز اقرا کنول عرف سسٹرولوجی، ندیم مبارک عرف نانی والا اور محمد حسنین شاہ کے خلاف 3 مقدمات درج کیے گئے ہیں۔ ذرائع کے مطابق تحقیقاتی ایجنسی نے مذکورہ افراد کو ان کا مؤقف جاننے کے لیے تین مرتبہ طلب کیا، انہوں نے جان بوجھ کر تفتیش میں شامل ہونے سے گریز کیا۔ تینوں افراد پر الزام ہے کہ وہ غیر قانونی آن لائن ٹریڈنگ ایپلی کیشنز کی تشہیرمیں ملوث رہے۔ مقدمات کے متن میں کہا گیا ہے کہ مذکورہ یوٹیوبرزپاکستانی عوام کو منافع کے لالچ میں ڈال کر ان ایپس میں سرمایہ کاری کے لیے اکساتے اور گمراہ کرتے رہے۔ مقدمات میں نامزد ملزمان کی گرفتاری کے لیے این سی سی آئی اے کی خصوصی چھاپہ مار ٹیمیں تشکیل دے دی گئی ہیں۔