قومی ویمنز کرکٹ ٹیم کولمبو پہنچ گئی، آج سے ٹریننگ سیشن کا آغاز

09-24-2025

(ویب ڈیسک) پاکستان ویمنز کرکٹ ٹیم آئی سی سی ویمنز کرکٹ ورلڈ کپ 2025 میں شرکت کے لیے کولمبو پہنچ گئی ہے۔

کپتان فاطمہ ثنا کی قیادت میں ٹیم کی تمام کھلاڑی خیریت سے سری لنکا پہنچیں جہاں وہ آج سے ورلڈ کپ کی تیاریوں کا باقاعدہ آغاز کریں گی۔ پاکستان ویمنز ٹیم کا پہلا ٹریننگ سیشن آج دوپہر 2 بجے مقامی وقت کے مطابق شروع ہوگا۔ ٹیم انتظامیہ نے ٹریننگ کے لیے مکمل شیڈول تیار کرلیا ہے جس میں کھلاڑیوں کی فٹنس، فیلڈنگ اور نیٹ پریکٹس پر خصوصی توجہ دی جائے گی۔ ٹورنامنٹ سے قبل پاکستان ٹیم دو وارم اپ میچز بھی کھیلے گی۔ پہلا وارم اپ میچ 25 ستمبر کو میزبان سری لنکا کے خلاف ہوگا، جب کہ دوسرا میچ 28 ستمبر کو جنوبی افریقہ کے خلاف شیڈول ہے۔ ان میچز کے ذریعے ٹیم کو کنڈیشنز سے ہم آہنگ ہونے کا موقع ملے گا۔ ورلڈکپ میں پاکستان ویمنز ٹیم کا افتتاحی میچ 2 اکتوبر کو بنگلہ دیش کے خلاف ہوگا۔  5 اکتوبر کو شائقین کو سب سے زیادہ انتظار کیے جانے والے مقابلے کا سامنا ہوگا جب پاکستان کا سامنا روایتی حریف بھارت سے ہوگا۔ پاکستان کا تیسرا میچ 8 اکتوبر کو آسٹریلیا ، چوتھا 15 اکتوبر کو انگلینڈ ، پانچواں 18 اکتوبر کو نیوزی لینڈ ، چھٹا میچ 21 اکتوبر کو جنوبی افریقہ اور آخری لیگ میچ 24 اکتوبر کو ایک بار پھر سری لنکا کے خلاف کھیلا جائے گا۔