پٹرولیم مصنوعات کی درآمدات میں سالانہ بنیادوں پر 5 فیصد کمی ریکارڈ

09-24-2025

(لاہور نیوز) پٹرولیم مصنوعات کی درآمدات میں جاری مالی سال کے پہلے دوماہ میں سالانہ بنیادوں پر 5 فیصد کی کمی ریکارڈ کی گئی ہے۔

پاکستان بیورو برائے شماریات کے اعدادو شمار کے مطابق جاری مالی سال کے پہلے دو ماہ میں پٹرولیم مصنوعات کی درآمدات پر 2.538 ارب ڈالر زرمبادلہ خرچ ہوا جو گزشتہ مالی سال کی اسی مدت کے مقابلے میں 5 فیصد کم ہے۔ اعداد وشمار کے مطابق گزشتہ مالی سال کی اسی مدت میں پٹرولیم مصنوعات کی درآمدات پر 2.662 ارب ڈالر زرمبادلہ خرچ ہوا تھا، اگست 2025 میں پٹرولیم مصنوعات کا مجموعی درآمدی بل 1.193 ارب ڈالر ریکارڈ کیا گیا جو گزشتہ سال اگست کے 1.398 ارب ڈالر کے مقابلے میں 14.7 فیصد کم ہے۔ جولائی کے مقابلے میں اگست میں پٹرولیم مصنوعات کی درآمدات میں ماہانہ بنیادوں پر 11.4 فیصد کی کمی ہوئی ہے، جولائی میں پٹرولیم مصنوعات کی درآمدات پر 1.346 ارب ڈالر زرمبادلہ خرچ ہوا تھا۔