جوئے کی تشہیر کیس: یوٹیوبر ڈکی بھائی کی درخواست ضمانت مسترد

09-23-2025

(لاہور نیوز) ضلع کچہری کے جوڈیشل مجسٹریٹ نعیم وٹو نے جوئے کی تشہیر سے متعلق کیس میں ملوث ملزم ڈکی بھائی کی ضمانت کا 3 صفحات پر مشتمل حکم نامہ جاری کر دیا۔

عدالتی حکم نامے میں کہا گیا ہے کہ درخواست گزار کے لاکھوں کی تعداد میں نوجوان فالوورز ہیں، ایسے سوشل میڈیا انفلوئنسر کی کوئی بھی غلطی بڑے پیمانے پر معاشرتی بگاڑ کا باعث بنتی ہے۔ حکم نامے کے مطابق درخواست گزار  نے کبھی انکار نہیں کیا کہ اس نے جوئے کی تشہیر نہیں کی، درخواست گزار سے جوئے کی تشہیر کی مد میں وصول 3 لاکھ 26 ہزار 420 ڈالرز ملے، وکیل نہیں بتا سکے کہ یہ رقم جوئے کی کمپنی سے نہیں ملی نہ ہی اس رقم کے ذرائع بتا سکے۔ حکم نامے میں کہا گیا ہے کہ درخواست گزار کے وکیل نے دلائل دیے کہ جھوٹا اور بے بنیاد مقدمہ درج کیا گیا، درخواست گزار کے وکیل کے مطابق انکوائری کے دوران درخواست گزار کو نوٹس موصول نہیں ہوا۔ کوئی ایسا بیان سامنے نہیں آیا جس سے یہ ثابت ہو کہ کسی کا نقصان ہوا ہے، ایف آئی اے کے مطابق درخواست گزار بڑے پیمانے پر جوئے کی ایپلیکشن کی پروموشن کر رہا تھا۔ واضح رہے کہ ڈکی بھائی جوا کھیلنے والی ایپ کی تشہیر کرنے کے الزام میں 17 اگست سے گرفتار ہے، نیشنل کرائم ایجنسی لاہور  نے ریاست کی مدعیت میں ان کے خلاف مقدمہ درج کر رکھا ہے، جسمانی ریمانڈ میں چھ بار توسیع کے بعد ملزم کو 14 روز کے لیے جوڈیشل ریمانڈ پر جیل بھیج دیا گیا ہے۔