اداکار ارباز خان نے بھی خوشبو کے ساتھ اپنی طلاق کی تصدیق کر دی

09-19-2025

(ویب ڈیسک) پاکستانی اداکار ارباز خان نے ماضی کی مقبول فلمی اداکارہ خوشبو خان کے ساتھ اپنی طلاق کی تصدیق کر دی ہے۔

ارباز خان  نے حال ہی میں ایک شو میں شرکت کی جہاں انہوں  نے مختلف موضوعات اور اپنی طلاق کی خبروں پر گفتگو کی۔ انہوں نے کہا کہ وہ اس وقت سنگل ہیں اور ان کے دل میں کسی کے لئے جگہ نہیں ہے۔ انہوں نے مزید کہا کہ زندگی کے تجربات  نے انہیں زیادہ پختہ کر دیا ہے اور وہ آگے بڑھ چکے ہیں، ہر دن ایک نیا سبق سکھاتا ہے اور اب وہ اس مرحلے سے گزر چکے ہیں جہاں کسی کے ساتھ فوری تعلق کی ضرورت محسوس ہوتی۔ اپنی موجودہ زندگی کے بارے میں بات کرتے ہوئے انہوں  نے کہا کہ وہ اپنی سنگل زندگی کا لطف اٹھا رہے ہیں کیونکہ ان کے مطابق تعلقات اکثر ذمہ داریوں اور مسائل کے ساتھ آتے ہیں جو کبھی کبھار انسان کے لئے بوجھ بن سکتے ہیں اور زندگی کو مشکل بنا کر کسی بھی انسان کو تباہ کر سکتے ہیں۔   اداکار کی سابقہ اہلیہ، اداکارہ خوشبو خان پہلے ہی اپنی طلاق کی تصدیق کر چکی ہیں، انہوں نے ایک انٹرویو میں بتایا تھا کہ ارباز خان پانچ سال قبل بغیر کسی اطلاع کے گھر چھوڑ کر چلے گئے تھے اور اس کے بعد کبھی واپس نہیں آئے۔