پی ایم ڈی سی کا ایم ڈی کیٹ امتحان ڈومیسائل کی بنیاد پر لینے کا فیصلہ

09-17-2025

(ویب ڈیسک) پاکستان میڈیکل اینڈ ڈینٹل کونسل (پی ایم ڈی سی) نے میڈیکل و ڈینٹل کالجز میں داخلہ کے لئے ایم ڈی کیٹ امتحان ڈومیسائل کی بنیاد پر لینے کا فیصلہ کیا ہے۔

فیصلے کے مطابق ہر طالب علم اپنے ڈومیسائل کے مطابق متعلقہ صوبے میں ٹیسٹ دے گا اور کسی دوسرے صوبہ میں امتحان نہیں دے سکے گا، چاروں صوبوں اور اسلام آباد میں میڈیکل و ڈینٹل کالجز میں داخلہ کے لئے یونیورسٹیز کی منظوری دی گئی ہے۔ پی ایم ڈی سی کے مطابق میڈیکل و ڈینٹل کالجز میں داخلہ کے لئے متعلقہ صوبہ کا ڈومیسائل لازمی ہو گا، آزاد کشمیر اور گلگت بلتستان کے رہائشیوں کے لئے بھی پاکستان کے میڈیکل و ڈینٹل کالجز میں نشستیں مختص ہیں۔ واضح رہے کہ امتحان 5 اکتوبر 2025 کو منعقد ہونا تھا لیکن اب یہ امتحان 26 اکتوبر 2025 (بروز اتوار) کو ہو گا۔