گورنر پنجاب سے فیصل عبدالستار ایدھی کی ملاقات، سیلابی صورتحال پر گفتگو

09-16-2025

(لاہور نیوز) گورنر پنجاب سردار سلیم حیدر خان سے فیصل عبدالستار ایدھی نے گورنر ہاؤس میں ملاقات کی، دوران ملاقات پنجاب میں سیلاب کی صورتحال پر تفصیلی گفتگو کی گئی۔

گورنر سلیم حیدر خان نے کہا ہے کہ عبدالستار ایدھی کے مشن کو آگے بڑھانا قابل ستائش ہے، عبدالستار ایدھی کی عوام الناس کیلئے فلاحی خدمات قابل تحسین ہیں۔ گورنر پنجاب نے کہا کہ مقامی این جی اوز اور مخیر حضرات کے تعاون سے پانی اور کھانے کے علاوہ خشک راشن کے بیگز بھی سیلاب زدگان میں تقسیم کیے گئے۔ گورنر سلیم حیدر خان کا کہنا تھا کہ سیلاب متاثرین نے ایدھی فاؤنڈیشن کی فلڈ ریلیف سروسز کو بہت سراہا، انہوں نے عبدالستار ایدھی کے بیٹے فیصل ایدھی کو عوام کی بے لوث خدمت پر شاباش بھی دی۔ اس موقع پر فیصل ایدھی نے کہا کہ ایدھی فاؤنڈیشن  نے موجودہ سیلاب کے دوران علی پور، جلالپور، پیر والا میں کشتیوں کے ذریعے 30 ہزار افراد کو ریسکیو کیا۔ فیصل ایدھی نے کہا کہ سیلاب زدہ علاقوں میں ایدھی فاؤنڈیشن کی ٹیمیں 18 دن مسلسل ریسکیو آپریشن میں شامل رہیں، انہوں نے کہا کہ چناب، راوی اور دریائے ستلج کیلئے 3 علیحدہ علیحدہ ٹیمیں تشکیل دی گئیں جن کی نگرانی میں  نے خود کی، اس موقع پر گورنر پنجاب نے فیصل ایدھی کو گراں قدر خدمات کے اعتراف میں اعزازی شیلڈ بھی پیش کی۔