سیلاب زدگان کی بحالی چیلنج، مریم نواز جلد ریلیف پیکیج کا اعلان کریں گی: عظمیٰ بخاری

09-15-2025

(لاہور نیوز) وزیر اطلاعات پنجاب عظمیٰ بخاری نے کہا ہے کہ پنجاب حکومت نے ملکی تاریخ کا سب سے بڑا ریسکیو آپریشن کیا ہے، سیلاب زدگان کی بحالی بڑا چیلنج ہے، مریم نواز جلد ریلیف پیکیج کا اعلان کریں گی۔

اپنے بیان میں عظمیٰ بخاری کا کہنا تھا کہ پنجاب نے ملکی تاریخ کے سب سے بڑے سیلاب کا سامنا کیا ہے، پنجاب حکومت کے بروقت اقدامات سے لاکھوں جانوں کو محفوظ بنایا گیا ہے، مریم نواز اور ان کی ٹیم سیلاب متاثرین کی خدمت میں دن رات مصروف ہیں۔ انہوں  نے کہا کہ پنجاب حکومت نے ملکی تاریخ کا سب سے بڑا ریسکیو آپریشن کیا ہے، پنجاب حکومت سیلاب متاثرین کیلئے اپنے تمام وسائل استعمال کر رہی ہے۔ ان کا کہنا تھا کہ سیلاب متاثرین کی آباد کاری ایک بڑا چیلنج ہے، سیلاب کے نقصان کا تخمینہ لگایا جا رہا ہے، سروے مکمل ہونے کے بعد وزیراعلیٰ پنجاب مریم نواز جلد ریلیف پیکیج کا اعلان کریں گی۔ صوبائی وزیر اطلاعات نے مزید کہا کہ پنجاب حکومت پر انگلی وہ اٹھا رہے جن کے اپنے صوبے میں سیلاب اور بارشوں سے سینکڑوں لوگ جاں بحق ہوئے، خیبرپختونخوا میں متاثرہ لوگ آج بھی بے یارومددگار پڑے ہیں، کے پی میں صوبائی حکومت لوگوں کے مسائل حل کر رہی نہ اپنی رٹ قائم کر پا رہی۔