بعض چھوٹے لوگ سیلاب متاثرین کے نام پر سیاست کررہے ہیں: عظمیٰ بخاری

09-13-2025

(لاہور نیوز) وزیراطلاعات پنجاب عظمیٰ بخاری نے کہا ہے کہ بعض چھوٹے لوگ سیلاب متاثرین کے نام پر سیاست کر رہے ہیں، پنجاب حکومت سیلاب سے متاثرہ ہر علاقے میں متاثرین تک پہنچ رہی ہے۔

وزیراطلاعات پنجاب عظمیٰ بخاری نے اپنے ایک بیان میں کہا کہ وزیراعلیٰ پنجاب مریم نواز مسلسل سیلاب متاثرین کے پاس خود جاکر انکو ملنے والی سہولیات کا جائزہ لے رہی ہیں،جہاں بھی کوئی انتظامی غلطی یا کوتاہی کی نشاندہی ہو تو مریم نواز فوری متعلقہ افسر کو جوابدہ بناتی ہیں۔ عظمیٰ بخاری نے کہا کہ سیلاب متاثرین کو ملنے والی سہولیات پر کسی قسم کا کوئی کمپرومائز نہیں ہوگا، تین ہفتوں سے مسلسل پنجاب کی انتظامیہ متاثرہ افراد کے درمیان موجود ہے، ضلعی انتظامیہ، سول ڈیفنس،ریسکیو،پنجاب پولیس و دیگر ادارے متاثرین کو ریسکیو کرنے اور ریلیف دینے میں مصروف ہیں، پاک فوج اور رینجرز کی ٹیمیں بھی جذبہ حب الوطنی سے سرشار ہیں۔  انہوں نے کہا کہ مریم نواز اپنے فرائض کو ایک درد دل رکھنے والی ماں اور ایک بہن کی طرح ادا کررہی ہے، سوشل میڈیا پر جھوٹے پروپیگنڈے کرنے والے انسانی جانوں کی اہمیت اور انکے مسائل سے عاری ہیں۔ وزیراطلاعات پنجاب نے کہا کہ کوئی سیلاب متاثرین کی دن رات خدمت کر رہا اور کوئی انکے نام پر اپنی سیاسی شعبدہ بازی کر رہا ہے، عوام جانتے ہیں کہ کون مشکل کی گھڑی میں انکے ساتھ ہے کون انکے زخموں پر نمک پاشی کررہا ہے۔