شاہدرہ ٹاؤن پولیس کی کارروائی، ہزاروں مالیت کی منشیات برآمد، ملزم گرفتار

09-13-2025

(لاہور نیوز) شاہدرہ ٹاؤن پولیس نے خفیہ اطلاع پر کامیاب کارروائی کرتے ہوئے منشیات فروشی کے ایک بڑے نیٹ ورک کو بے نقاب کر دیا۔

کارروائی کے دوران ملزم قربان کو گرفتار کیا گیا جس کے قبضے سے 5 کلوگرام سے زائد اعلیٰ کوالٹی کی منشیات برآمد کی گئی۔ ایس پی سٹی بلال احمد کے مطابق ملزم قربان مقامی ٹرانسپورٹ کے ذریعے شہر کے مختلف علاقوں میں منشیات سپلائی کرتا تھا، وہ شاپنگ بیگز میں منشیات چھپا کر سپلائی کا کام سرانجام دیتا تھا تاکہ شک نہ ہو۔ پولیس کی بروقت کارروائی نے نہ صرف منشیات کی بڑی کھیپ کو مارکیٹ میں پہنچنے سے روکا بلکہ لاہور کی نوجوان نسل کو بھی ایک ممکنہ خطرے سے بچا لیا۔ پولیس کا کہنا ہے کہ جیسے ہی خفیہ اطلاع پر ٹیم موقع پر پہنچی تو ملزم  نے فرار ہونے کی کوشش کی لیکن ناکام رہا اور موقع پر ہی گرفتار کر لیا گیا، ملزم کے خلاف مقدمہ درج کر کے مزید تحقیقات کا آغاز کر دیا گیا ہے۔ ایس پی سٹی بلال احمد  نے انسداد منشیات کے خلاف کامیاب کارروائی پر شاہدرہ ٹاؤن پولیس کی ٹیم کو شاباش دی اور اس عزم کا اظہار کیا کہ حکومت پنجاب کے احکامات پر عمل کرتے ہوئے لاہور کو منشیات سے پاک شہر بنانے کی ہر ممکن کوشش کی جائے گی۔