کمشنر و ڈپٹی کمشنر لاہور کا سیلاب سے متاثرہ تھیم پارک سوسائٹی کا دورہ

09-11-2025

(لاہور نیوز) کمشنر لاہور مریم خان اور ڈپٹی کمشنر سید موسیٰ رضا نے تھیم پارک سوسائٹی کا دورہ کیا۔

کمشنر لاہور  نے تھیم پارک سوسائٹی سے سیلابی پانی کے نکاس کیلئے کام کا جائزہ لیا، بریفنگ میں بتایا گیا کہ تھیم پارک سے اوسطاً 60 فیصد سیلابی پانی ڈرین آؤٹ و پمپ کیا جا چکا ہے، سیلابی پانی کو نکالنے کیلئے مزید مشینری لگا دی گئی ہے، موہلنوال تھیم پارک میں اوسطاً 18فٹ تک اونچا راوی سیلاب کا پانی موجود تھا۔ کمشنر لاہور مریم خان نےکہا اس وقت اوسطاً 4 تا 5فٹ پانی موجود ہے نکاسی تیز کر دی گئی ہے، تھیم پارک سوسائٹی کا ایریا 63سو کنال اور 25تا30 ہزار آبادی ہے، تھیم پارک میں 20 ڈی واٹرنگ مشینیں،6 کرینیں فعال ہیں جبکہ ضلعی انتظامیہ، واسا، ایم سی ایل، روڈا اور پاک افواج کی ٹیمیں کام کر رہی ہیں۔