ہائیکورٹ کا ملزمان کے انٹرویوز کروانے والے پولیس اہلکاروں کیخلاف کارروائی کا حکم

09-10-2025

(لاہور نیوز) لاہور ہائیکورٹ نے زیر حراست ملزمان کے انٹرویوز کرانیوالوں پولیس اہلکاروں کیخلاف کارروائی کا حکم دے دیا۔

عدالت  نے میڈیا سے گفتگو کروانے والے وارڈن، ایکسائز و پولیس اہلکاروں کیخلاف کارروائی کا حکم دیا ہے، دوران سماعت ایڈیشنل آئی جی پنجاب  نے عدالت کو یقین دہانی کرائی کہ زیر حراست ملزموں  کے انٹرویوز نہیں کرائے جائیں گے۔ سی ٹی او ڈاکٹر اظہر وحید، ڈائریکٹر سائبر کرائم حشمت کمال، ڈی جی ایکسائز عمر شیر چٹھہ، ایڈیشنل آئی جی انویسٹی گیشن شہزادہ سلطان اور ڈی آئی جی لیگل اویس ملک عدالت میں پیش ہوئے۔ جسٹس علی ضیا باجوہ  نے شہری وشال احمد شاکر کی درخواست پر سماعت کی، دوران سماعت عدالت نے ریمارکس دیئے کہ ٹریفک وارڈنز قانون کے مطابق چالان ضرور کریں، کیمرے کے سامنے ویڈیو بنوائی تو سخت کارروائی ہو گی، فاضل جج  نے سوال کیا کہ ملزم کی ویڈیو بنائے بغیر کیا تفتیش نہیں ہو سکتی؟ ایڈیشنل آئی جی انویسٹی گیشن  نے کہا کہ میرے خیال میں ملزم کی تشہیر مناسب نہیں، عدالت نے استفسار کیا کہ سپریم کورٹ کا بھی اس حوالے سے فیصلہ آچکا، عملدرآمد کیلئے کیا اقدامات کیے؟ حکام کی جانب سے بتایا گیا کہ فیلڈ ڈیوٹی افسران کو میڈیا نمائندوں سے گفتگو نہ کرنے کی ہدایات دے دی گئی ہیں۔