ماڈل ٹاؤن: خاوند ہی اپنی بیوی کے زیورات چوری میں ملوث نکلا

09-10-2025

(لاہور نیوز) لاہور میں ایک افسوسناک واقعے میں خاوند نے اپنی ہی بیوی کے قیمتی زیورات چوری کر لیے۔

پولیس کے مطابق متاثرہ خاتون کی سوشل میڈیا کے ذریعے فیصل جاوید نامی شخص سے دوستی ہوئی تھی تاہم اس کا دو سال قبل نکاح ہوا، فیصل کا تعلق دیپالپور سے ہے۔ خاتون اپنی بہن سے ملنے کے لیے گھر سے باہر گئی، واپسی پر معلوم ہوا کہ گھر سے تقریباً 3 کروڑ روپے مالیت کے 80 تولے کے طلائی زیورات چوری ہو چکے ہیں جس پر خاتون نے تھانہ ماڈل ٹاؤن میں مقدمہ درج کرایا۔ پولیس کے مطابق ابتدائی شواہد کی بنیاد پر خاوند کو شاملِ تفتیش کیا گیا، محض 3 گھنٹے کی تفتیش کے بعد ملزم مہر فیصل جاوید نے اپنے جرم کا اعتراف کر لیا۔ پولیس کا کہنا ہے کہ ملزم کی نشاندہی پر زیورات گھر سے ہی برآمد کر لئے گئے تاہم ملزم 80 تولہ میں سے 15 تولہ سونا فروخت کر کے رقم ہڑپ کر چکا ہے، ملزم سے مزید تفتیش جاری ہے۔