اسرائیل نے قطر پر حملہ کر کے عالمی قوانین کو پامال کیا: طاہر اشرفی

09-10-2025

(ویب ڈیسک) پاکستان علماء کونسل کے چیئرمین حافظ محمد طاہر محمود اشرفی نے کہا ہے کہ پاکستان علماء کونسل برادر اسلامی ملک قطر پر اسرائیلی حملہ کی شدید مذمت کرتی ہے۔

پاکستان علماء کونسل کے چیئرمین حافظ محمد طاہر محمود اشرفی نے کہا کہ اسرائیل نے قطر پر حملہ کر کے عالمی قوانین کو پامال کیا ہے اور قطر کی سلامتی و استحکام کو خطرہ میں ڈالنے کی کوشش کی ہے، اسرائیلی جارحیت و بربریت اسلامی عرب ممالک کے خلاف بڑھتی جا رہی ہے جس پر امت مسلمہ اور دنیا میں امن چاہنے والے ممالک کو فوری طور پر اقدامات اٹھانے ہوں گے۔ طاہر اشرفی نے کہا کہ جب بھی فلسطین کے معاملے پر مثبت سمت پیش رفت ہونے لگتی ہے اسرائیل جارحیت کر کے اس کو تباہ کر دیتا ہے، ہم قطر کی حکومت اور عوام کے شانہ بشانہ ہیں اور ہر ممکن تعاون کا یقین دلاتے ہیں۔ انہوں نے کہا کہ ہم اسلامی تعاون تنظیم کے سربراہ، مملکت سعودی عرب اور تمام اسلامی اور عرب ممالک اور دنیا میں امن چاہنے والے ممالک سے اپیل کرتے ہیں کہ وہ اسرائیل کی جارحیت کے خلاف ایک متفقہ لائحہ عمل مرتب کریں، اب وقت آ گیا ہے کہ اسرائیل کے جرائم کا تعاقب کیا جائے۔