اپوزیشن کے انتخابی عمل کا بائیکاٹ کرنا ان کا سیاسی فیصلہ ہے: سپیکر پنجاب اسمبلی

09-09-2025

(لاہور نیوز) سپیکر پنجاب اسمبلی ملک محمد احمد خان نے کہا ہے کہ اپوزیشن کے انتخابی عمل کا بائیکاٹ کرنا ان کا سیاسی فیصلہ اور صوابدید ہے۔

سپیکر پنجاب اسمبلی ملک محمد احمد خان  نے اسمبلی اجلاس کے دوران میڈیا سے غیر رسمی گفتگو میں کہا کہ اپوزیشن  نے اگرچہ بائیکاٹ کا اعلان کیا، لیکن اپنا امیدوار الیکشن کمیشن سے ریٹائر نہیں کیا جس کے باعث انتخابی عمل کرانا ضروری ہو گیا، میں سیاسی عمل کا حامی ہوں، بائیکاٹ جیسے فیصلے عوامی نمائندگی اور ان کے حقوق سے دوری کا باعث بنتے ہیں۔ گفتگو کے دوران سپیکر پنجاب اسمبلی نے میاں نواز شریف کے ساتھ ہونے والے سلوک پر بھی شدید تحفظات کا اظہار کیا، انہوں  نے کہا کہ جتنا انتقام میاں نواز شریف سے لیا گیا اتنی زیادتی کسی اور سیاسی رہنما کے ساتھ نہیں ہوئی، ن لیگ کے رہنماؤں پر ناجائز مقدمات بنائے گئے، ان کے گھر جلائے گئے۔ ملک محمد احمد خان  نے 9 مئی کے واقعات کا حوالہ دیتے ہوئے کہا کہ ریاست پر حملہ کیا گیا، کور کمانڈر کے گھر اور رانا ثناء اللہ کے گھر پر حملہ ہوا، یہ ایک خطرناک رجحان ہے جس کی مذمت ہونی چاہئے۔ علیمہ خان پر انڈا پھینکے جانے کی شدید الفاظ میں مذمت کرتے ہوئے ان کا کہنا تھا کہ جس نے بھی یہ حرکت کی ہے، اس کے خلاف سخت کارروائی ہونی چاہئے، سیاسی اختلافات اپنی جگہ، مگر ذاتی حملے قابل قبول نہیں۔