سری لنکن فیکٹری منیجر قتل کیس: 15 مجرموں کی اپیلوں پر سماعت مؤخر

09-09-2025

(لاہور نیوز) لاہور ہائیکورٹ میں سیالکوٹ میں قتل ہونے والے سری لنکن فیکٹری منیجر پریانتھا کمارا کے کیس میں سزائے موت اور عمر قید کی سزا پانے والے مجموعی طور پر 15 مجرموں کی اپیلوں پر سماعت نہ ہو سکی۔

یہ سماعت دو رکنی بینچ کے سربراہ جسٹس سید شہباز رضوی کی عدم دستیابی کے باعث ری شیڈول کر دی گئی ہے، سماعت کیلئے جسٹس سید شہباز رضوی اور جسٹس طارق محمود پر مشتمل دو رکنی بینچ تشکیل دیا گیا تھا۔ پریانتھا کمارا کو 3 دسمبر 2021 کو سیالکوٹ میں ہجوم  نے توہین مذہب کے الزام پر بے دردی سے قتل کیا تھا، ٹرائل کورٹ نے اس واقعہ میں مجموعی طور پر 89 ملزمان کو مجرم قرار دیتے ہوئے مختلف سزائیں سنائیں۔ ٹرائل کورٹ نے 6 مجرموں محمد حمیر، تیمور احمد، محمد ارشاد، علی حسنین، ابو طلحہ اور عبدالرحمٰن کو دو دو دفعہ سزائے موت اور دو دو لاکھ روپے معاوضہ مقتول کے ورثا کو ادا کرنے کا حکم دیا تھا، جبکہ 9 مجرموں روحیل امجد، محمد شعیب، احتشام زیب، عمران ریاض، ساجد امین، ضیغم مہدی، علی حمزہ، لقمان حیدر اور عبدالصبور کو عمر قید اور دو دو لاکھ روپے جرمانہ کے ساتھ دو دو لاکھ روپے معاوضہ دینے کی سزا سنائی گئی تھی۔ اس کے علاوہ باقی 74 ملزمان کو 2، 2 سال قید بامشقت کی سزا دی گئی تھی جو اپنی سزائیں مکمل کر کے جیل سے رہا ہو چکے ہیں۔