پنجاب میں سیلاب متاثرین کی بحالی و امداد کا آغاز

09-05-2025

(لاہور نیوز) وزیر اعلیٰ پنجاب مریم نواز شریف کی ہدایات کے پیش نظر سیلاب متاثرین کی بحالی و امداد کا آغاز کر دیا گیا۔

ریلیف کمشنر پنجاب نبیل جاوید کی زیر صدارت پی ڈی ایم اے ہیڈ آفس میں اہم اجلاس ہوا، جس میں سیلاب کے باعث ہونے والے نقصانات اور امداد فراہم کرنے کے فریم ورک کا جائزہ لیا گیا۔ اجلاس میں محکمہ آبپاشی، زراعت، لوکل گورنمنٹ، سی اینڈ ڈبلیو، اربن یونٹ اور دیگر محکموں کے افسران نے شرکت کی، سیلاب سے متاثرہ جگہوں کی تفصیلی مشترکہ سروے رپورٹ تیار کرنے کی ہدایت کی گئی۔ ریلیف کمشنر پنجاب نے کہا کہ سروے میں زیرِ آب رقبہ، فصلوں کا نقصان اور مالی تخمینہ شامل ہو گا جبکہ سروے میں محکمہ زراعت، آبپاشی اور ریونیو افسران بھی شریک ہوں گے۔ نبیل جاوید نے مزید کہا کہ متاثرہ علاقوں کی فہرست SUPARCO سیٹلائٹ ڈیٹا سے تیار کی جائے گی، پی ڈی ایم اے پنجاب نے مالی نقصانات کا تعین کرنے کیلئے پروفارما بھی جاری کر دیا ہے۔