ملزمان مقابلے میں مارے گئے، ہائیکورٹ نے سی سی ڈی کی رپورٹ پر بازیابی کی درخواست نمٹا دی

09-05-2025

(لاہور نیوز) لاہور ہائیکورٹ نے پولیس مقابلے میں مارے گئے پانچ افراد کی بازیابی کی درخواست کرائم کنٹرول ڈیپارٹمنٹ کی رپورٹ کے بعد نمٹا دی۔

لاہور ہائیکورٹ میں جسٹس تنویر احمد شیخ نے پانچ افراد کی بازیابی کی درخواست پر سماعت کی۔ ایس پی کرائم کنٹرول ڈیپارٹمنٹ ناصر عباس پنجوتھہ پیش ہوئے،عدالت نے کرائم کنٹرول ڈیپارٹمنٹ کی رپورٹ کے بعد درخواست نمٹا دی۔ ایس پی کرائم کنٹرول ڈیپارٹمنٹ ناصر عباس پنجوتھہ نے عدالت میں بتایا کہ ملزمان پاکپتن، اوکاڑہ ،قصور، وہاڑی میں وارداتیں کرتے تھے، ملزمان چنگ چی رکشہ پر خواتین کے ساتھ مل کر گھروں میں وارداتیں کرتے تھے، ملزمان نے ڈکیتی وارداتوں کے دوران دس افراد کو قتل کیا۔ ملزمان کے ڈکیتی واردات کرنے کی اطلاع پر پولیس نے کارروائی کی، ملزمان پولیس مقابلے میں ہائیکورٹ میں درخواست دائر کرنے سے پہلے مارے گئے۔ سرور بی بی کی دائر درخواست میں موقف اختیار کیا گیا کہ اشفاق، ندیم سمیت پانچ افراد کو پولیس نے حبس بے جا رکھا ہوا ، مغویوں کی جان کو خطرات لاحق ہیں، عدالت مغویوں کی بازیابی کیلئے احکامات جاری کرے ۔