مریم نواز سیلاب متاثرین کے بڑے ریلیف پیکیج کا جلد اعلان کریں گی: عظمیٰ بخاری

09-03-2025

(لاہور نیوز) وزیر اطلاعات پنجاب عظمیٰ بخاری نے کہا ہے کہ مریم نواز سیلاب متاثرین کے بڑے ریلیف پیکج کا جلد اعلان کریں گی۔

دنیا نیوز کے پروگرام’’نقطہ نظر‘‘میں گفتگو کرتے ہوئے عظمیٰ بخاری کا کہنا تھا کہ سیلاب سے متاثرہ بہت بڑا ریسکیوآپریشن کیا گیا ہے، تمام ادارے دن رات کام کر رہے ہیں، گزشتہ کئی سالوں  سے کبھی ایسا نہیں ہوا کہ مون سون کا چار ماہ کا سپیل آیا ہو۔ انہوں نے کہا کہ ریلیف کیمپ بند کرنے کے حوالے سے سوشل میڈیا پر جھوٹی خبریں چلائی جا رہی ہیں، بچوں کی تعلیمی سرگرمیاں جاری رکھنے کیلئے ریلیف کیمپوں میں ہی سکولز قائم کیے گئے ہیں، وزیر اعلیٰ پنجاب سیلاب متاثرین کے بڑے ریلیف پیکج کا جلد اعلان کریں گی۔ وزیر اطلاعات پنجاب کا مریم نواز کے دوروں کے حوالے سے سوال کے متعلق کہنا تھا کہ وزیر اعلیٰ کے دوروں کے دوران ایک طرف انتظامیہ پر چیک اینڈ بیلنس رہتا ہے اور دوسری جانب وہ کھانا، ادویات، جانوروں کے چارے اور ریسکیو سے متعلق ضلع کے کمشنر اور ڈپٹی کمشنرز سے روزانہ کی بنیاد پر رپورٹس لیتی ہیں۔ عظمیٰ بخاری نے وزیر اعلیٰ کی تصویر کے حوالے سے ایس او پیز کے بارے میں بتایا کہ مریم نواز کی تصویر سے بہت سے مخالفین کو تشویش اور ڈر لگتا ہے، کیوں کہ انہوں  نے اپنی محنت سے بہت سے لوگوں کی محبت سمیٹ لی ہے، انہوں نے کہا کہ تصویر لگانے کی اجازت نہیں یہ کچھ لوگوں کی جانب سے اوور ڈؤنگ ہو رہی ہے۔ وزیر اطلاعات پنجاب نے کہا کہ فوڈ سکیورٹی کے ممکنہ بحران کے حوالے سے وزیر اعلیٰ پنجاب نے کل تین گھنٹے اجلاس کیا، پنجاب حکومت اقدامات کر رہی ہے کہ اشیا خور و نوش کی قیمتوں میں اضافہ نہ ہو۔ عظمیٰ بخاری کا کہنا تھا کہ اینٹی کرپشن  نے دریا اور ندی نالوں کی آبی گزرگاہوں میں قائم ہاؤسنگ سوسائٹیز کے مالکان کے حوالے سے کارروائیاں شروع کر دی ہیں، آج ایک ہاؤسنگ سوسائٹی کا مالک بھی گرفتار کیا گیا جبکہ باقی کی بھی تفصیلات منگوا لی ہیں۔ انہوں  نے کہا کہ سیلاب کے دوران اور بند توڑنے کے حوالے سے مریم نواز  نے کسی قسم کی کوئی مداخلت نہیں کی، انہوں نے اس حوالے سے کوئی سیاسی دباؤ قبول نہیں کیا۔ علی امین گنڈا پور کے کالا باغ ڈیم کے حوالے سے بیان بارے وزیر اطلاعات پنجاب کا کہنا تھا کہ مریم نواز بھی اس حوالے سے سنجیدہ ہیں، اُن کی پالیسی ہے کہ وہ تمام لوگوں کو ساتھ لے کر چلتی ہیں جبکہ آنے والے دنوں میں ایسی آفات سے نمٹنے کیلئے اتفاق رائے سے فیصلے کریں گی۔