ٹرائی نیشن سیریز: افغانستان نے پاکستان کو 18 رنز سے شکست دیدی

09-02-2025

(لاہور نیوز) سہ ملکی ٹی ٹوئنٹی سیریز کے چوتھے میچ میں افغانستان نے پاکستان کو 18 رنز سے شکست دیکر ایونٹ میں مسلسل دوسری فتح حاصل کرلی۔

170 رنز کے ہدف کے تعاقب میں قومی ٹیم مقررہ 20 اوورز میں 9 وکٹوں کے نقصان پر 151 رنز بناسکی، پاکستان کی جانب سے حارث رؤف 34 رنز کیساتھ نمایاں رہے۔ قبل ازیں شارجہ میں کھیلے گئے ایونٹ کے چوتھے میچ میں افغانستان نے ٹاس جیت کر پہلے بیٹنگ کا فیصلہ کیا، تاہم پہلے بیٹنگ کرتے ہوئے افغانستان نے مقررہ 20 اوورز میں 5 وکٹوں کے نقصان پر 169 رنز بنائے۔ افغانستان کی جانب سے ابراہیم زادران 65 اور صدیق اللہ اٹل 64 رنز بنا کر نمایاں رہے، رحمان اللہ گرباز 8، محمد نبی 6 اور عظمت اللہ عمرزئی 4 رنز کے انفرادی سکور پر پویلین لوٹے، کریم جنت اور کپتان راشد خان8،8 رنز بنا کر ناٹ آؤٹ رہے۔ پاکستان کی جانب سے فہیم اشرف نے 4 کھلاڑیوں کو آؤٹ کیا جبکہ صائم ایوب نے 1 وکٹ حاصل کی۔ واضح رہے کہ پاکستان اور افغانستان کے درمیان یہ ایونٹ کا دوسرا ٹی 20 میچ تھا، پہلے میچ میں پاکستان نے 39 رنز سے فتح اپنے نام کی تھی، پاکستانی ٹیم اب تک ایونٹ میں ناقابل شکست  تھی۔