پنجاب میں سیلابی صورتحال بہتر ، تریموں پر زیادہ دباؤ ہے: عظمیٰ بخاری

09-02-2025

(لاہور نیوز) وزیرِاطلاعات پنجاب عظمیٰ بخاری نے کہا ہے کہ پنجاب میں سیلاب کی مجموعی صورتحال قدرے بہتر ہے، انتظامیہ کی کارروائیوں سے حالات کنٹرول میں ہیں۔

پریس کانفرنس کرتے ہوئے وزیرِاطلاعات پنجاب عظمیٰ بخاری کا کہنا تھا کہ اس وقت سب سے زیادہ دباؤ تریموں ہیڈ ورکس پر ہے جہاں پانی کی سطح بلند ہے، تاہم دیگر تمام مقامات پر پانی نیچے کی جانب جا رہا ہے۔ انہوں نے کہا کہ بارشوں کا ایک اور سلسلہ کل سے شروع ہو چکا ہے، جو نہ صرف پاکستان بلکہ بھارت میں بھی جاری ہے اور یہی صورتحال دونوں جانب ایک ڈبل چیلنج کی شکل اختیار کر چکی ہے، وزیراعلیٰ پنجاب مریم نواز  نے خود تریموں کا دورہ کیا جہاں انہیں حالات پر تفصیلی بریفنگ دی گئی، متاثرہ علاقوں میں وبائی امراض پھیلنے کا خطرہ موجود ہے جس کے پیش نظر محکمہ صحت اور دیگر ادارے الرٹ ہیں، متاثرہ علاقوں میں پھنسے ہوئے افراد کو فوری طور پر ریسکیو بھی کیا جا رہا ہے۔ وزیرِاطلاعات پنجاب نے کہا کہ اس وقت ہیڈ محمد والا پر صورتحال نازک ہے جہاں ممکنہ خطرے کے پیش نظر ٹریفک بند کر دی گئی ہے اور بریچ کرنے کے امکانات کو بھی مدنظر رکھا جا رہا ہے، موجودہ حالات میں سیاست سے بالاتر ہو کر قومی یکجہتی کے ساتھ فیصلے کرنے کی ضرورت ہے۔ انہوں  نے اس بات پر اطمینان کا اظہار کیا کہ تمام صوبے اپنی ذمہ داری کا احساس کر رہے ہیں، پہلی بار گنڈاپور صاحب کی جانب سے ڈیمز کے حوالے سے مثبت بات سننے کو ملی، جو خوش آئند ہے۔ انہوں نے مزید کہا کہ پاکستان کو موسمیاتی تبدیلی کے اثرات سے بچانے کیلئے ڈیمز کی تعمیر پر سنجیدگی سے فیصلے کرنے ہوں گے، فی الحال پنجاب میں ریلیف آپریشن کے سوا کوئی اور کام نہیں ہو رہا، حکومت کی اولین ترجیح متاثرین کو دوبارہ ان کے گھروں میں بسانا ہے اس کے بعد ہی دیگر کاموں پر توجہ دی جائے گی۔