وزیر اعلی مریم نواز سیلاب کی صورتحال کا جائزہ لینے پی ڈی ایم اے کے ہیڈ آفس پہنچ گئیں
08-30-2025
(لاہور نیوز) وزیراعلیٰ پنجاب مریم نواز نے پی ڈی ایم اے کا دورہ کیا، اس موقع پر انہوں نے انتظامیہ کو ہدایت کی کہ سیلاب متاثرہ علاقوں میں ریلیف آپریشن میں کوئی کمی نہیں آنی چاہیے۔
لاہور میں مریم نواز کا سیلابی صورت حال اور امدادی سرگرمیوں کے جائزہ اجلاس کے بعد گفتگو کرتے ہوئے کہنا تھا کہ تمام محکمے سیلاب متاثرین کی مدد میں پیش پیش ہیں، موجودہ صورت حال کا کئی دہائیوں کے بعد سامنا کرنا پڑا۔ انہوں نے کہا کہ جھنگ، ملتان ، مظفر گڑھ سیلاب سے متاثر ہو سکتے ہیں، اوکاڑہ، ساہیوال، ٹوبہ ٹیک سنگھ، خانیوال اور قصور کے بھی سیلاب سے متاثر ہونے کا خطرہ ہے جبکہ پاکپتن، وہاڑی، بہاولنگر، بہاولپور، راجن پور اور رحیم یار خان بھی متاثر ہو سکتے ہیں۔ مریم نواز نے کہا کہ بھارت نے سپل وے کھولے جس سے دریا بپھر گئے، پاکستان کی تاریخ کا سب سے بڑا ریسکیو آپریشن کیا گیا، بھارت کی جانب سے پانی چھوڑنے پر معاملات زیادہ خراب ہوئے، سیلاب کے دوران پوری ٹیم کی خدمات قابل ستائش ہیں، کمشنرز اور ڈپٹی کمشنرز نے بہترین کارکردگی کا مظاہرہ کیا، انتظامیہ کی کارکردگی کو سراہتی ہوں ادارے سیلاب متاثرین کے لیے دن رات کام کررہے ہیں۔ وزیراعلیٰ پنجاب نے کہا کہ مسلسل بارشوں کے باعث سیلاب کی صورتِ حال پیدا ہوئی،جہاں جہاں سیلاب کا خطرہ ہے وہاں لوگوں کا بروقت انخلا مکمل کیا جائے، ہم سب عوام کو جواب دہ ہیں، سہولیات کی فراہمی یقینی بنائی جائے، عوام کو کھانا ، پینا اور دیگر سہولیات فراہم کررہے ہیں۔ ان کا کہنا تھا کہ کوئی بھی متاثرہ شخص خود کو تنہا نہ سمجھے، ریسکیو آپریشن میں 6 لاکھ متاثرین اور مویشیوں کو محفوظ مقامات پر منتقل کیا گیا،ملتان ، ٹوبہ ٹیک سنگھ ، قصور اور دیگر خطرات والے علاقوں میں لوگوں کا انخلا یقینی بنا رہے ہیں۔ مریم نواز نے کہا کہ ریسکیو آپریشن میں صرف لوگوں کی جان نہیں بچائی گئی بلکہ ساڑھے چار لاکھ مویشیوں کو بھی محفوظ مقامات پر منتقل کیا گیا، اب بھی انتظامیہ کو ہدایت کرتی ہوں کہ ریلیف آپریشن میں کوئی کمی نہیں آنی چاہیے۔ وزیر اعلیٰ پنجاب کا مزید کہنا تھا کہ کرتارپور میں ہنگامی بنیادوں پر پانی کی نکاسی کے احکامات جاری کیے، کرتارپور میں فوری نکاسی آب یقینی بنانے پر ٹیم کو شاباش دیتی ہوں جب کہ انہوں نے بارڈر پار سے بھی کرتارپور کی صفائی ستھرائی میں حصہ لینے والوں کی خدمات کو سراہا۔