پنجاب کے 16 اضلاع میں یکم ستمبر سے پولیو مہم کا آغاز ہو گا

08-28-2025

(لاہور نیوز) یکم ستمبر سے پنجاب کے 16 اضلاع میں پولیو مہم شروع ہو گی۔

انسداد پولیو پروگرام سربراہ عدیل تسور کی زیرِ صدارت مہم کی تیاریوں کا جائزہ لینے کے لئے اجلاس ہوا، جس میں 16 اضلاع کے محکمہ صحت افسران نے ویڈیو لنک پر شرکت کی۔ اجلاس میں بتایا گیا کہ لاہور میں پولیو مہم 1 تا 7 ستمبر جبکہ دیگر 15 اضلاع میں 1 تا 4 ستمبر جاری رہے گی، عدیل تصور  نے اس حوالے سے کہا کہ مہم میں 11.17 ملین بچوں کو قطرے پلانے کا ہدف مقرر کیا گیا ہے۔ 94 ہزار سے زائد پولیو ورکرز مہم میں حصہ لیں گے۔ انہوں نے کہا کہ مہم لاہور، راولپنڈی، فیصل آباد، رحیم یار خان، ڈی جی خان، بہاولپور، گوجرانوالہ، سیالکوٹ، اٹک، میانوالی، ملتان، اوکاڑہ، قصور، مظفرگڑھ، راجن پور اور شیخوپورہ میں منعقد ہو گی۔ انسداد پولیو پروگرام کے سربراہ نے کہا کہ 10 اضلاع میں مہم جزوی علاقوں میں جبکہ باقی میں مکمل طور پر ہوگی۔ انہوں نے کہا کہ سیلاب اور بارش کے باوجود مہم ہر صورت کامیاب ہو گی، انہوں نے مزید کہا کہ پولیو ورکرز بچوں کے اصل محافظ ہیں، ان کی محنت ہر گھر کو محفوظ بناتی ہے ، ہر بچے کو پولیو کے قطرے پلائے جائیں گے۔