وزیر اعظم شہباز شریف اور وزیر اعلیٰ مریم نواز کل نارووال کا دورہ کریں گے

08-27-2025

(لاہور نیوز) وزیر اعظم شہباز شریف کل 28 اگست کی صبح نارووال اور سیالکوٹ کے سیلاب زدہ علاقوں کا اہم دورہ کریں گے اور اہم اعلان بھی کریں گے، وزیراعظم متاثرین سے ملاقات کریں گے، اس موقع پر وزیر اعلی پنجاب مریم نواز شریف بھی ان کے ہمراہ ہوں گی۔

اسلام آباد میں پرائم منسٹر ہاؤس کے ذرائع نے بتایا کہ وزیر اعظم شہباز شریف صبح نارووال اور سیالکوٹ کا اہم دورہ کریں گے، وزیر اعظم کے ہمراہ وزیر اعلیٰ مریم نواز، این ڈی ایم اے کے چیئرمین اور کئی وفاقی وزراء بھی ہوں گے۔ وزیراعظم شہباز شریف، وزیر اعلیٰ مریم نواز کے ساتھ کرتار پور اور سیال کوٹ کے سیلاب سے متاثرہ علاقوں کا وزٹ کریں گے اور سیلاب زدہ شہریوں کے حالات کا خود مشاہدہ کریں گے۔  ذرائع  نے بتایا کہ وزیر اعظم اور وزیر اعلیٰ کو پہلے سیلاب زدہ علاقوں کا فضائی معائنہ کروایا جائے گا، اس کے بعد وہ بریفنگ میں شریک ہوں گے، مقامی انتظامیہ اور ریسکیو اینڈ ریلیف آپریشن کرنے  والے حکام انہیں سیلاب کی صورتحال اور نقصانات پر اپ ڈیٹس دیں گے تاہم وزیر اعظم سیلاب زدہ علاقوں کیلئے اہم اعلان بھی کریں گے۔ سیالکوٹ سے تعلق رکھنے والےوفاقی وزیر خواجہ آصف اور نارووال سے تعلق رکھنے والے احسن اقبال بھی  وزیراعظم شہباز شریف کےہمراہ ہوں گے۔