لاہور میں 10ویں کلر اینڈ کیم ایکسپو 30 اور 31 اگست کو منعقد ہوگی

08-27-2025

(لاہور نیوز) پاکستان میں رنگوں، کیمیکلز اور اس سے وابستہ صنعتوں کی سب سے بڑی اور جدید نمائش ۔۔۔ 10ویں کلر اینڈ کیم ایکسپو 2025 ۔۔۔ 30 اور 31 اگست 2025 کو لاہور انٹرنیشنل ایکسپو سینٹر میں منعقد ہوگی۔

ایکسپو کے دوران ڈیجیٹل ٹیکسٹائل پرنٹنگ انڈسٹری ایکسپو بھی منعقد ہوگی، جس میں ڈیجیٹل ٹیکسٹائل پرنٹنگ، سکرین پرنٹنگ اور جدید مشینری کے بین الاقوامی معیار کے حل پیش کیے جائیں گے۔ دونوں نمائشیں بیک وقت منعقد ہو کر ٹیکسٹائل، کیمیکل اور پرنٹنگ انڈسٹری کے بڑے کھلاڑیوں کو ایک ہی چھت تلے اکٹھا کریں گی۔ اس میگا ایونٹ میں 150 سے زائد ملکی و غیر ملکی کمپنیاں شرکت کر رہی ہیں۔ نمائش کے سربراہ عبد الرحیم چغتائی ہیں۔ ایونٹ کے منتظم راشد الحق نے بتایا کہ یہ نمائشیں شرکاء کو نیٹ ورکنگ، علم کے تبادلے اور کاروباری ترقی کے لیے بے مثال مواقع فراہم کریں گی، ان میں پاکستان اور بیرونِ ملک سے مینوفیکچررز، سپلائرز، ڈسٹری بیوٹرز، محققین، ایکسپورٹرز اور انوویٹرز شریک ہوں گے، رجسٹرڈ انڈسٹری پروفیشنلز کے لیے داخلہ بالکل مفت ہوگا۔ راشد الحق نے اس موقع پر زور دیا کہ کلر اینڈ کیم ایکسپو، جو اب اپنے دسویں ایڈیشن میں داخل ہو چکا ہے، پاکستان کی کیمیکل اور ٹیکسٹائل صنعتوں کے لیے ایک نمایاں پلیٹ فارم بن گیا ہے جو برآمدات، جدت اور مسابقت کو فروغ دینے میں کلیدی کردار ادا کر رہا ہے، دونوں نمائشیں روزانہ صبح 10 بجے سے شام 6 بجے تک لاہور ایکسپو سینٹر میں جاری رہیں گی۔