سینیٹ ضمنی الیکشن :رانا ثناء اللہ کے کاغذات نامزدگی منظور، اپیل جرمانے کیساتھ خارج

08-27-2025

(لاہور نیوز) مسلم لیگ (ن) کے رہنما رانا ثناء اللہ کے سینیٹ کے ضمنی الیکشن کیلئے کاغذاتِ نامزدگی منظور ہونے کے خلاف اپیل الیکشن ٹریبونل نے پانچ لاکھ روپے جرمانے کے ساتھ خارج کر دی۔

جسٹس خالد اسحاق پر مشتمل ٹریبونل  نے ایڈووکیٹ محمد آفاق کی جانب سے دائر اپیل پر سماعت کی۔  درخواست گزار ایڈووکیٹ محمد آفاق پیش ہوئے، جسٹس خالد اسحاق  نے  درخواست گزار وکیل سے استفسار کیا کہ کیا آپ  نے اعتراضات فائل کئے تھے؟ جس پر وکیل  نے جواب دیا کہ اعتراضات فائل کئے ہیں لیکن ان کی کاپی اس وقت ساتھ نہیں۔ اس پر عدالت نے ریمارکس دیئے کہ آپ ووٹر نہیں ہیں، آپ اعتراضات کیسے دائر کر سکتے ہیں؟ عدالت نے قرار دیا کہ درخواست گزار نہ تو تجویز کنندہ ہیں اور نہ ہی تائید کنندہ، اس لئے وہ اپیل دائر کرنے کے اہل نہیں۔ جسٹس  خالد اسحاق  نے درخواست گزار وکیل سے مکالمہ کرتے ہوئے کہا آپ کو عدالت  کا قیمتی وقت ضائع کرنے پر جرمانہ ہو گا، یہ وقت میرا یا آپ کا نہیں بلکہ عوام کا ہے، جسٹس خالد اسحاق  نے وکیل سے مکالمے کے دوران واضح کیا کہ اگر اپیل خارج ہوئی تو پانچ لاکھ روپے جرمانہ ہو گا۔ درخواست گزار تسلی بخش جواب نہ دے سکا جس پر الیکشن ٹریبونل  نے اپیل خارج کرتے ہوئے ایڈووکیٹ محمد آفاق کو پانچ لاکھ روپے جرمانہ عائد کر دیا، مزید یہ بھی حکم دیا گیا کہ جب تک جرمانہ ادا نہیں کیا جاتا، اس وقت تک رجسٹرار آفس میں درخواست گزار کا کوئی کیس سماعت کے لئے مقرر نہ کیا جائے۔