پارلیمانی سیکرٹری برائے انسانی حقوق سونیا عاشر کا جناح ہسپتال کا دورہ

08-27-2025

(لاہور نیوز) پارلیمانی سیکرٹری برائے انسانی حقوق سونیا عاشر نے جناح ہسپتال لاہور کا دورہ کیا اور مختلف وارڈز کا تفصیلی معائنہ کیا۔

انہوں  نے مریضوں سے علاج معالجے کی سہولیات کے بارے میں دریافت کیا اور ان کے مسائل سنے، دورے کے دوران سونیا عاشر  نے ہسپتال میں صفائی کی صورتحال کا بھی جائزہ لیا اور خاص طور پر وارڈز اور واش رومز کی صفائی پر خصوصی توجہ دینے کی ہدایت کی۔ ان کا کہنا تھا کہ صحت کے شعبے میں بہتری حکومت کی اولین ترجیحات میں شامل ہے اور ہسپتالوں کی حالت بہتر بنانے کے لئے خصوصی فنڈز مختص کئے گئے ہیں۔ سونیا عاشر  نے کہا کہ حکومت مریضوں کو معیاری اور بروقت علاج فراہم کرنے کے لئے تمام ممکنہ اقدامات کر رہی ہے، انہوں  نے ہسپتال انتظامیہ پر زور دیا کہ مریضوں کو زیادہ سے زیادہ سہولیات فراہم کی جائیں تاکہ وہ بہترین علاج کے ساتھ جلد صحتیاب ہو سکیں۔