دریائے ستلج میں 48 گھنٹے میں انتہائی اونچے درجے کے سیلاب کا خدشہ، انتظامیہ الرٹ

08-26-2025

(لاہور نیوز) دریائے ستلج میں48گھنٹے کے دوران انتہائی اونچے درجے کے سیلاب کا خدشہ پیدا ہوگیا۔

سیلاب کے خدشہ کے پیش نظر پی ڈی ایم اے پنجاب نے متعلقہ اضلاع کے کمشنر و ڈپٹی کمشنرز کو الرٹ کر دیا، لاہور،ساہیوال، بہاولپور، ملتان اورڈی جی خان کے کمشنرز کو الرٹ رہنے کی ہدایت کر دی گئی۔ قصور، اوکاڑہ، پاکپتن، بہاولنگر، وہاڑی، لودھراں کے ڈپٹی کمشنر کو بھی الرٹ جاری کیا گیا، بہاولپور، ملتان اور مظفر گڑھ کے ڈپٹی کمشنر کو بھی الرٹ جاری کیا گیا۔ ریلیف کمشنر پنجاب نے کمشنرز، ڈپٹی کمشنرز و واسا حکام کو بھی الرٹ رہنے کا حکم دے دیا ، اس کے علاوہ لوکل گورنمنٹ، محکمہ زراعت، آب پاشی، صحت، جنگلات، لائیو سٹاک اور ٹرانسپورٹ کو بھی الرٹ جاری کر دیا گیا ہے۔ ڈی جی پی ڈی ایم اے کا کہنا ہے کہ وزیراعلیٰ پنجاب کی ہدایت کے پیش نظر تمام تر انتظامات مکمل کریں، ہنگامی صورتحال سے نمٹنے کیلئے ریسکیو ٹیمیں پیشگی حساس مقامات پر تعینات کرنے کی ہدایت کی ہے۔