ڈرائیونگ لائسنس کے اجرا میں تیزی، مزید 26 ہزار سے زائد شہری مستفید

08-23-2025

(لاہور نیوز) پنجاب بھر میں ٹریفک پولیس کی جانب سے شہریوں کو ڈرائیونگ لائسنس کی فراہمی کا عمل تیز رفتاری سے جاری ہے۔

گزشتہ 24 گھنٹوں کے دوران 26 ہزار سے زائد شہریوں نے لائسنسنگ مراکز سے مستفید ہو کر ڈرائیونگ لائسنس حاصل کئے جو کہ ایک ریکارڈ تعداد ہے۔ دوسری جانب ٹریفک قوانین کی خلاف ورزیوں پر بھی سخت کارروائی کی گئی، پولیس  نے 24 گھنٹوں میں 39 ہزار سے زائد شہریوں کو چالان ٹکٹ جاری کئے، جن میں زیادہ تر کیسز بغیر ہیلمٹ، اوور سپیڈنگ، غلط پارکنگ اور اشارہ توڑنے کے تھے۔ ڈی آئی جی ٹریفک پولیس کا کہنا تھا کہ ٹریفک قوانین کی پاسداری ہم سب کی اجتماعی اور بنیادی ذمہ داری ہے، اگر شہری ٹریفک قوانین پر عمل کریں تو نہ صرف بھاری جرمانوں سے بچا جا سکتا ہے بلکہ قیمتی جانیں بھی محفوظ رہ سکتی ہیں۔ ڈی آئی جی  نے مزید کہا کہ ٹریفک پولیس کا مقصد صرف چالان کرنا نہیں بلکہ شہریوں میں شعور بیدار کرنا بھی ہے تاکہ سڑکوں پر ایک محفوظ ماحول یقینی بنایا جا سکے۔