برائلر گوشت کی بلیک مارکیٹ، 650 روپے کلو میں بکنے لگا

08-23-2025

(لاہور نیوز) ملک بھر میں مہنگائی نے عوام کی کمر توڑ دی ہے، برائلر گوشت اور روزمرہ استعمال کی سبزیوں و پھلوں کی قیمتیں قابو سے باہر ہو چکی ہیں۔

برائلر مافیا کے ہاتھوں یرغمال بنی ہوئی ہے، مارکیٹ میں مرغی کا گوشت 595 روپے فی کلو پر جا کر رک گیا ہے، جبکہ کئی علاقوں میں یہ گوشت 650 روپے فی کلو تک بک رہا ہے، صافی گوشت تو 750 روپے فی کلو کی بلند ترین سطح پر پہنچ چکا ہے، جو متوسط طبقے کی پہنچ سے باہر ہو چکا ہے۔ ادھر زندہ برائلر کی ہول سیل قیمت 397 روپے فی کلو جبکہ پرچون میں 411 روپے فی کلو ہے، لیکن اس کے باوجود مارکیٹ میں صارفین کو کہیں بھی معیاری اور سستا  دستیاب نہیں۔ انڈوں کی قیمت بھی مسلسل بلند سطح پر برقرار ہے، ایک درجن انڈے 295 روپے میں فروخت ہو رہے ہیں جبکہ ایک پیٹی انڈے 8 ہزار 730 روپے میں مارکیٹ میں دستیاب ہے۔ دوسری جانب سبزیوں اور پھلوں کی قیمتوں  نے بھی عوام کا جینا محال کر دیا ہے، پیاز 100 روپے، ٹماٹر 130، لہسن 400، ادرک 600، سبز مرچ 150 اور لیموں 250 روپے فی کلو میں فروخت ہو رہے ہیں، ٹینڈے 260، آلو 120، کریلے اور شملہ مرچ 200، گوبھی 180، جبکہ گھیاتوری 150 روپے فی کلو میں دستیاب ہے۔ پھلوں کی قیمتیں بھی کچھ کم نہیں، کیلا 260 روپے درجن، پپیتا 650، آم 450، سیب 420، آڑو اور مسمی 400، خوبانی 380 جبکہ ناشپاتی 350 روپے فی کلو میں بیچی جا رہی ہے۔