لاہور سمیت صوبہ بھر میں سرچ، سویپ اور کومبنگ آپریشنز: سیکڑوں جرائم پیشہ افراد گرفتار

08-22-2025

(لاہور نیوز) پنجاب پولیس نے لاہور سمیت صوبہ بھر میں سرچ، سویپ، کومبنگ آپریشنز کے دوران سیکڑوں جرائم پیشہ و مشتبہ افراد گرفتار کر لیے۔

ترجمان پنجاب پولیس کے مطابق گذشتہ 24 گھنٹوں کے دوران 500 کومبنگ آپریشنز کے دوران 16 ہزار 159 سے زائد مشتبہ افراد کی چیکنگ کی گئی، جس کے دوران 57 مشکوک افراد حراست میں لئے گئے، اسکے علاوہ 33 سرچ اینڈ سویپ آپریشنز کے دوران 3577 سے زائد افراد سے پوچھ گچھ کی گئی جس میں سے 02 مشتبہ افراد زیرحراست ہیں۔ ترجمان پنجاب پولیس کا کہنا ہے کہ سنگین جرائم میں ملوث 645 اشتہاری، 193 عدالتی مفرور، 87 عادی مجرموں کو بھی گرفتار کیا گیا، جرائم پیشہ و مشتبہ افراد کے قبضہ سے بڑی تعداد میں ناجائز اسلحہ اور گولیاں برآمد ہوئیں، جرائم پیشہ افراد کے خلاف کارروائیوں کے دوران 10 مجرمان کیفر کردار کو پہنچے جبکہ 05 زخمی حالت میں گرفتار کر لیے گئے۔   آئی جی پنجاب کا کہنا تھا کہ ملک دشمن و جرائم پیشہ عناصر کا محاسبہ کرنے کیلئے سرچ، سویپ اینڈ کومبنگ آپریشنز جاری رکھے جائیں۔