انڈیگو روڈ پر ناقص گھی سپلائی کرنیوالی فیکٹری کیخلاف کارروائی، 81 ہزار کلو گھی تلف

08-22-2025

(لاہور نیوز) پنجاب فوڈ اتھارٹی نے انڈیگو روڈ پر قائم معروف برانڈ کی گھی سپلائی کرنے والی فیکٹری کے خلاف بڑی کارروائی کرتے ہوئے 81 ہزار کلو ناقص گھی کا تیار سٹاک تلف کر دیا۔

تفصیلات کے مطابق کارروائی ڈی جی فوڈ اتھارٹی عاصم جاوید کی سربراہی میں کی گئی، فیکٹری سے حاصل کردہ سیمپل معیاری نہ ہونے کی بنا پر فیل ہو گئے تھے، اس کے علاوہ فیکٹری انتظامیہ کی جانب سے سابقہ ہدایات پر عمل درآمد نہ کرنے پر 5 لاکھ روپے کا جرمانہ بھی عائد کیا گیا ہے۔ ڈی جی فوڈ اتھارٹی عاصم جاوید  نے میڈیا سے گفتگو کرتے ہوئے کہا کہ تلف کیا گیا بناسپتی گھی پنجاب فوڈ اتھارٹی کے مقرر کردہ معیار کے منافی پایا گیا، جو انسانی صحت کیلئے خطرناک ہو سکتا تھا۔ انہوں  نے واضح کیا کہ اشیائے خورونوش کے معیار پر کسی قسم کا سمجھوتہ نہیں کیا جائے گا، پنجاب بھر میں ناقص اور غیر معیاری خوراک تیار یا فروخت کرنے والوں کے خلاف بلاامتیاز کارروائیاں جاری رہیں گی۔