تربیلا ڈیم سو فیصد بھر گیا، منگلا میں 36 فیصد گنجائش باقی

08-21-2025

(لاہور نیوز) مون سون کی بارشوں کے نئے سپیل کے دوران بڑے ڈیموں کے متعلق اہم خبر آ گئی۔

تربیلا ڈیم 100 فیصد اور منگلا ڈیم 74 فیصد بھر چکا ہے جبکہ پنجاب کے دریاؤں میں پانی کے بہاؤ میں اضافہ ہو رہا ہے، کہاں کہاں سیلابی صورتحال ہے، اس حوالے سے اہم تفصیلات سامنے آئی ہیں۔ ڈائریکٹر جنرل پی ڈی ایم اے پنجاب عرفان علی کاٹھیا نے کہا کہ تربیلا ڈیم 100 فیصد اور منگلا ڈیم 74 فیصد بھر چکا ہے، عوام الناس سے التماس ہے کہ ان ڈیمز کی جھیلوں کے قریب جاتے ہوئے احتیاطی تدابیر اختیار کریں۔ عرفان کاٹھیا  نے کہا دریاؤں کے پاٹ میں موجود شہری فوری محفوظ مقامات پر منتقل ہو جائیں، ہنگامی انخلا  کی  وارننگ آنے کی صورت میں انتظامیہ سے تعاون کریں، شہری دریاؤں نہروں ندی نالوں اور تالابوں میں ہر گز مت نہائیں، سیلابی صورتحال میں دریاؤں کے اطراف  سیر و تفریح سے گریز کریں، بچوں کو دریاؤں ندی نالوں کے قریب ہرگز مت جانے دیں۔ ایمرجنسی کی صورتحال میں پی ڈی ایم اے پنجاب کی ہیلپ لائن  پر رابطہ کریں، شہریوں کی جان و مال کا تحفظ پی ڈی ایم اے پنجاب کی ذمہ داری ہے۔