پاکستان اور امریکا توانائی شعبے میں تعاون بڑھانے پر متفق

08-20-2025

(لاہورنیوز)وفاقی وزیر پیٹرولیم علی پرویز ملک اور امریکی ناظم الامور نیٹلی اے بیکر کے درمیان ملاقات ہوئی جس میں تیل، گیس اور معدنیات کے شعبوں میں پاکستان اور امریکا کے درمیان دوطرفہ تعاون کو مضبوط بنانے پر تفصیلی تبادلہ خیال کیا گیا۔

ملاقات کے دوران نیٹلی بیکر نے کہا کہ صدر ٹرمپ کے وژن کے مطابق امریکی کمپنیاں پاکستان کے تیل، گیس اور معدنیات کے شعبے میں گہری دلچسپی رکھتی ہیں، امریکی سفارتخانہ ایکسپلوریشن اینڈ پروڈکشن سیکٹر میں امریکی اور پاکستانی کمپنیوں کے درمیان براہ راست روابط کو سہولت فراہم کرے گا۔ علی پرویز ملک نے بتایا کہ حکومت پاکستان آنشور اور آفشور میں تیل و گیس کے ایکسپلوریشن بلاکس کی بڈنگ راؤنڈ کر رہی ہے جو بین الاقوامی سرمایہ کاروں کے لیے زبردست مواقع فراہم کرے گا۔ انہوں نے کہا ہے کہ پاکستان میں شیل آئل اور گیس سمیت وسیع مقامی وسائل موجود ہیں اور حکومت ان وسائل کو ٹھوس ذخائر میں تبدیل کرنے کے لیے پرعزم ہے۔ وفاقی وزیر نے مزید کہا ہے کہ پاک امریکا کاؤنٹر ٹیررازم ڈائیلاگ کے بعد دونوں ممالک معاشی شعبے میں تعاون کو بھی بڑھانا چاہتے ہیں۔ نیٹلی بیکر نے اس عزم کا خیرمقدم کرتے ہوئے کہا ہے کہ امریکی سرمایہ کار پاکستانی توانائی سیکٹر میں شراکت داری کے مواقع سے فائدہ اٹھائیں گے اور معلومات کے تبادلے کے ذریعے اس شعبے کو فروغ دیا جائے گا۔